Kryetari i Partisë Demokratike të Kosovës, Memli Krasniqi, pas vendimit për lirimin e tre policëve të kidnapuar nga forcat serbe, ka falënderuar miqtë ndërkombëtarë, të cilët siç ka thënë ai, janë angazhuar dhe luajtën një rol vendimtar në këtë proces.
Krasniqi, nëpërmjet një postimi në rrjetin social Facebook, është shprehur se vendimi për lirimin e Rifat Zekës, Beqir Sefës e Shemsi Mustafës, është lajm i mirë.
“Lirimi i tre policëve nga mbajtja arbitrare në Serbi – Rifat Zekës, Beqir Sefës e Shemsi Mustafës, megjithëse mjaft i vonuar, është lajm i mirë për familjet e tyre dhe për qytetarët e shtetin tonë. Falënderoj të gjithë miqtë tanë ndërkombëtarë, të cilët u angazhuan dhe luajtën një rol vendimtar në këtë proces”, ka shkruar kreu i PDK-së.
Ndër të tjera, Krasniqi ka thënë se tani është për shtensionimin e situatës në pjesën veriore të vendit dhe për rikthimin e normalitetit atje, “përmes veprimeve të matura dhe të përgjegjshme politike”.
Në një reagim të tij edhe deputeti i Lidhjes Demokratike të Kosovës, Avdullah Hoti ka thënë se lirimi i tre policëve të Policisë së Kosovës është lajm i mirë.
Ai ka falënderuar ndërkombëtarët për lirimin e policëve.
Ka shtuar se një angazhim të fuqishëm e ka pasur edhe Shqipëria.
“Falënderojmë miqtë ndërkombëtarë për përkushtimin për lirimin e tyre. Republika e Kosovës është mbështetur gjithmonë tek miqtë. Falënderim i veçantë për Shqipërinë për angazhimin e fuqishëm dhe koordinimin me aleatët e Kosovës për lirimin e policëve”, ka shkruar ai.
