Komisioni i Pavarur i mediave, ka propozuar që t’i japë 30 ditë afat Klan Kosovës, që ta plotësojë dokumentacionin e nevojshëm sipas ligjeve të Republikës së Kosovës për mbajtje të licencës.
“Obligohet ofruesi Klan Kosova, që në afat 30 ditësh të plotësojë dokumentacionin e nevojshëm për mbajtjen e licencës së transmetimit, konform rregullores… së KPM-së”, ka thënë Kryetari i KPM-së, Jeton Mehmeti.
Nëse nuk e respekton këtë kërkesë të KPM-së, atëherë do të merren sanksione ndaj Klan Kosovës.
“Dështimi për të vepruar në pajtim me rregulloren… brenda afatit të përcaktuar do të rezultojë me masa sanksionuese me nenin 30 të KPM-së”, ka vijuar ai.
Tutje ai ka thënë se “të licencuarit obligohen t’ia ofrojnë KPM-së, ndryshimin e pronarëve, identifikimin i pronarëve që kanë më shumë se 10% të aksioneve, i licencuari nuk mund ta bartë licencën te dikush tjetër pa miratim të KPM-së”.
Ministria e Industrisë, Ndërmarrësisë dhe Tregtisë me 14 qershor ka marrë vendim që të pezullojë certifikatën e biznesit të Shoqërisë Tregtare “KLAN KOSOVA” Sh.P.K.
Ministria ka njoftuar ka iniciuar kallëzim penal ndaj Shoqërisë Tregtare “KLAN KOSOVA” SHPK, zyrtarëve përgjegjës nga Agjencia për Regjistrimin e Bizneseve dhe personave përgjegjës të kompanisë, nën dyshimin për keqpërdorim të detyrës zyrtare, si dhe keqpërdorim të autorizimeve ekonomike.
Për rastin e Klan Kosovës, ka pasur edhe reagime mes tjerash nga ambasadorë të shteteve evropiane në Kosovë.
