Kombëtarja e Kosovës ka arritur suksesin më të madh në historinë e saj të shkurtër ndërkombëtare, duke u ngjitur për herë të parë në vendin e 94-të të renditjes botërore të FIFA-s. Ky progres i madh vjen pas fitores spektakolare ndaj Suedisë me rezultatin 2-0, në sfidën e fundit të shtatorit për eliminatoret e “Botërorit 2026”.
Në të njëjtën kohë, edhe Shqipëria ka përfituar nga rezultatet pozitive. Kuqezinjtë fituan dy pozicione në renditje, duke u ngjitur në vendin e 66-të pas triumfeve kundër Gjibraltarit në miqësore dhe Letonisë në eliminatore. Ky është pozicioni më i mirë për vitin 2025 për Shqipërinë, e cila kulmin historik e pati në vitin 2015 kur arriti deri në vendin e 22-të.
Në nivel global, renditja e FIFA ka sjellë lëvizje të mëdha. Spanja është rikthyer në krye pas plot 11 vitesh, duke lënë pas Francën në vendin e dytë dhe Argjentinën, kampione bote në fuqi, në vendin e tretë. Anglia, rivale e Shqipërisë në grupin K, ruan vendin e katërt, ndërsa Serbia ka pësuar rënie me dy pozita, duke u renditur tashmë e 34-ta.
Ky zhvillim është një moment historik për Kosovën dhe një sinjal inkurajues për futbollin shqiptar në tërësi.
