Një delegacion i Policisë së Kosovës, në kuadër të një vizite zyrtare në Republikën e Turqisë, është pritur nga përfaqësues të lartë të Policisë Kombëtare Turke.
Zëvendës Drejtori i Përgjithshëm i Policisë së Kosovës, kolonel Fehmi Hoti, është takuar me homologun e tij turk, kolonel Mustafa Çalışkan, ku u diskutua për bashkëpunimin ndërmjet dy institucioneve dhe mundësitë e zgjerimit të tij.
“Vizita u realizua në kuadër të një delegacioni të përbashkët të Policisë së Kosovës dhe Ministrisë së Punëve të Brendshme, të kryesuar nga zëvendës drejtori i përgjithshëm. Gjatë takimit u diskutuan çështjet e bashkëpunimit të deritanishëm ndërmjet dy organizatave policore, me theks të veçantë në bashkërendimin e aktiviteteve bilaterale”, thuhet në njoftim
Gjatë takimit palët vlerësuan lart bashkëpunimin ekzistues, duke theksuar rëndësinë e shkëmbimit të informatave, zhvillimin e bashkëpunimit ndërkombëtar dhe përfshirjen në iniciativa të përbashkëta ndërkombëtare
Po ashtu, u diskutua për forcimin e bashkëpunimit në luftën kundër krimit të organizuar, krimeve të rënda, migrimit ilegal dhe terrorizmit.
Gjithashtu, u trajtuan mundësitë e zgjerimit të bashkëpunimit në ngritjen e kapaciteteve profesionale, përfshirë zhvillimin e burimeve njerëzore, avancimin e kapaciteteve teknike dhe teknologjike.
“Të dy palët u dakorduan për thellimin e mëtejmë të bashkëpunimit dhe intensifikimin e kontakteve në funksion të rritjes së sigurisë dhe stabilitetit në nivel rajonal dhe ndërkombëtar”, thuhet pos tjerash në këtë njoftim.
