Me ftesë të ministrit të Bujqësisë dhe Zhvillimit Rural të Shqipërisë, Andis Salla, ministri në detyrë i Bujqësisë, Pylltarisë dhe Zhvillimit Rural i Kosovës, Armend Muja, zhvilloi një vizitë zyrtare në Tiranë, me fokus forcimin e bashkëpunimit ndërinstitucional mes dy vendeve.
Gjatë vizitës, ministrat nënshkruan dy marrëveshje bashkëpunimi, të cilat synojnë avancimin e politikave të përbashkëta në sektorin agro-ushqimor, rritjen e standardeve në fushën e sigurisë ushqimore, veterinarisë dhe fitosanitetit, si dhe thellimin e koordinimit institucional.
Sipas Ministrisë së Bujqësisë, marrëveshjet parashohin gjithashtu zgjerimin e bashkëpunimit në zhvillimin rural, mbështetjen e fermerëve përmes politikave bujqësore dhe skemave financiare, si dhe përafrimin e mëtejshëm me standardet dhe praktikat e Bashkimit Evropian.
Një ndër prioritetet e bashkëpunimit mbetet modernizimi i sektorit përmes digjitalizimit të shërbimeve bujqësore, forcimi i kapaciteteve në kërkimin shkencor, inovacion dhe transferimin e teknologjive bashkëkohore, me synim rritjen e efikasitetit dhe konkurrueshmërisë së sektorit.
Ministria e Bujqësisë vlerësoi se këto marrëveshje përbëjnë një hap të rëndësishëm në konsolidimin e partneritetit strategjik ndërmjet Kosovës dhe Shqipërisë, duke kontribuar në zhvillimin e qëndrueshëm të bujqësisë, rritjen e sigurisë ushqimore dhe përmirësimin e mirëqenies së komuniteteve rurale në të dy vendet.
