Zëvendësministri i Punëve të Jashtme dhe Diasporës, Kreshnik Ahmeti, ka zhvilluar një takim me homologen e tij nga El Salvador, Adriana Mira, gjatë të cilit janë nënshkruar Marrëveshja për Konsultime Politike dhe Memorandumi i Bashkëpunimit në Fushën e Kulturës.
Këto marrëveshje konsiderohen hap i rëndësishëm drejt thellimit të marrëdhënieve dypalëshe, duke krijuar mekanizma të rregullt dialogu dhe bashkëpunimi për çështje me interes të përbashkët. Palët janë pajtuar që konsultimet e para politike ndërmjet dy ministrive të mbahen së shpejti në Prishtinë, ndërsa Ahmeti ka ftuar Mirën për një vizitë zyrtare në Kosovë.
Gjatë takimit është diskutuar edhe për zgjerimin e bashkëpunimit në fusha të tjera si ekonomia, arsimi, energjia dhe turizmi, si dhe për mundësinë e heqjes së regjimit të vizave nga El Salvadori për qytetarët e Kosovës.
Në kuadër të vizitës, zëvendësministri Ahmeti është takuar edhe me ministrin e kulturës së El Salvadorit, Raul Neftalí Castillo Rosales, me të cilin ka biseduar për avancimin e bashkëpunimit kulturor, përfshirë shkëmbimin e përvojave në ruajtjen dhe promovimin e trashëgimisë kulturore.
