Misioni i NATO-s në Kosovë, KFOR, ka thënë se pas sulmit të armatosur nga grupi paramilitar serb në Banjskë të Zveçanit e kanë katërfishuar praninë në veri, ndërsa kanë trefishuar numrin e patrullimeve, përfshirë ato përgjatë vijës kufitare me Serbinë.
Më 24 shtator, një grup paramilitar serb hyri në Banjskë me qëllim, sipas Qeverisë së Kosovës, aneksimin e pjesës veriore. Sulmi u parandalua me kohë nga Policia e Kosovës, ku si pasojë mbeti i vdekur rreshteri Afrim Bunjaku. U vranë edhe tre sulmues të armatosur. Që nga ajo ditë, pavarësisht se Kosova ka publikuar dëshmi e ka kërkuar që Serbisë t’i vihen sanksione pasi thonë se qëndron prapa sulmit të armatosur, shtetet perëndimore kanë ngurruar të veprojnë.
Në një përgjigje për KOHËN, KFOR-i ka thënë se këto hapa janë marrë për të siguruar që misioni vazhdon ta përmbushë mandatin për mjedis të sigurt për të gjithë njerëzit në Kosovë.
“Pas ngjarjes së 24 shtatorit, NATO ka dislokuar gati 1000 trupa shtesë në KFOR. Ne kemi katërfishuar praninë e KFOR-it në veri të Kosovës dhe kemi trefishuar numrin e patrullimeve, duke përfshirë edhe përgjatë vijës kufitare administrative. Këto janë hapa të kujdesshëm për të siguruar që KFOR-i të vazhdojë të përmbushë mandatin e tij – bazuar në Rezolutën 1244 të Këshillit të Sigurimit të Kombeve të Bashkuara të vitit 1999 – për të siguruar mjedis të sigurt, për të gjithë njerëzit në Kosovë, në çdo kohë dhe në mënyrë të paanshme”, thuhet në përgjigjen e KFOR-it.
Sipas KFOR-it, situata në veri tani është më e qetë, por mbetet e brishtë.
“Në përgjithësi, situata e sigurisë tani është më e qetë, por ajo mbetet e brishtë. KFOR-i vazhdon të operojë si reagues i tretë në Kosovë, respektivisht pas Policisë së Kosovës dhe misionit të BE-së për Sundimin e Ligjit (EULEX)”, vijon përgjigja e tyre.
KFOR-i ka potencuar edhe një herë se hetimet për sulmin në Banjskë u takojnë autoriteteve përkatëse në Prishtinë dhe Beograd.
“KFOR-i nuk është organizatë e zbatimit të ligjit. KFOR-i ruan rolin e tij si reagues i tretë i sigurisë, pas Policisë së Kosovës dhe EULEX-it. Ne u kemi kërkuar autoriteteve përkatëse në Prishtinë dhe në Beograd që të kryejnë hetimet e nevojshme ligjore për të vërtetuar faktet dhe për të sjellë përgjegjësit para drejtësisë”, thuhet në përgjigjen e tyre/koha
