Trupat e KFOR-it në Kosovë, të përforcuara nga një kontigjent i Mbretërisë së Bashkuar i ardhur së fundmi, sot (27 shtator), në kampin e ushtrimeve në “Novo Sellë”, do të fillojnë stërvitjen “Shpata e Artë”.
Përmes një komunikate për medie KFOR ditë më parë ka njoftuar se komunitetet lokale mund të shohin rritje të qarkullimit të mjeteve të transportit ushtarak dhe civil.
Kjo stërvitje, siç njoftuan ditë më parë nga KFOR-i, do të zgjasë deri më 2 nëntor të këtij viti. Pjesë e kësaj stërvitjeje të organizuar nga KFOR-i do të jetë edhe misioni i EULEX-it.
Kjo stërvitje e KFOR-it në Kosovë ndodh në periudhë kur është në fuqi vendimi i autoriteteve kosovare për riregjistrimin e makinave me targa që i lëshojnë autoritetet serbe në RKS.
Sipas vendimit të fundit të Qeverisë së Kosovës, data 31 tetor është afati i fundit për zëvendësimin e targave në fjalë. Raportet e medieve nga terreni flasin se interesimi i palës serbe për marrjen targave RKS dhe largimi nga targat që lëshohet autoritet serbe është i ulët.
Ministri i Punëve të Brendshme i Kosovës, Xhelal Sveçla, lidhur me këtë temë javën e kaluar njoftoi se një oficeri serb të Policisë së Kosovës iu ishte djegur makina pse kishte vendosur targat RKS.
Një veprim të tillë sipas Sveçlës e kanë kryer strukturat ilegale.
Situata aktuale në Kosovë është e qetë, por sipas zëvendëskomandantit të KFOR-it, Luca Piperni, nuk mund të përjashtohen tensione të reja në veri pas 31 tetorit kur skadon afati i riregjistrimit të makinave.
