Korporata Energjetike e Kosovës (KEK Sh.A.) ka reaguar sot ndaj disa raportimeve dhe spekulimeve në publik duke sqaruar se projekti kapital “Rehabilitimi dhe Modernizimi i Njësisë A3 në Termocentralin Kosova A” nuk është anuluar, por është pezulluar përkohësisht si rezultat i një ankese të paraqitur në Organin Shqyrtues të Prokurimit (OSHP).
Sipas KEK-ut, pezullimi është një veprim proceduror automatik, i përcaktuar nga Ligji për Prokurimin Publik (LPP), i cili hyn në fuqi në momentin kur një operator ekonomik dorëzon ankesë në OSHP.
“Ky është një mekanizëm standard ligjor dhe nuk përbën rast të veçantë. Zyrtari i Prokurimit ka ndërmarrë veprimet e nevojshme duke dorëzuar kërkesën për heqjen e pezullimit më 2 korrik 2025”, thuhet në reagimin e KEK-ut.
Korporata ka shprehur bindjen se ankesa e paraqitur është e pabazuar dhe ka kërkuar trajtim me prioritet të lartë nga OSHP, për shkak të rëndësisë strategjike të projektit për sektorin energjetik të vendit.
Në të njëjtën linjë është edhe raporti zyrtar i Ekspertit Shqyrtues të OSHP-së (nr. lëndës 2025/0579), i cili ka rekomanduar refuzimin e ankesës si të palejuar.
KEK ka ritheksuar përkushtimin për një proces transparent, të drejtë dhe konkurrues, në bashkëpunim me konsulencën e USAID, që ka ndihmuar në hartimin profesional të dokumentacionit të tenderit sipas standardeve ndërkombëtare.
Në fund, KEK i bën thirrje publikut dhe të gjitha palëve të interesuara që të mos bien pre e dezinformatave dhe të kontribuojnë në një debat të shëndoshë, të bazuar në fakte dhe ligjshmëri.
