Me ftesën e zonjës së parë të SHBA-ve, Jill Biden dhe Sekretarit amerikan të Shtetit Antony Blinken, ish-presidentja e Kosovës, Atifete Jahjaga ka marrë pjesë në ceremoninë e ndarjes së çmimit për Gratë më të Guximshme të vitit, në Shtëpinë e Bardhë.
”Ishte moment i veçantë të rikthehem në Shtëpinë e Bardhë për të qenë pjesë e kësaj ceremonie që shpërblen guximin, lidershipin dhe frymëzimin e grave, të cilat i bashkojnë vlerat për më shumë liri dhe drejtësi”, ka shkruar mes tjerash ish-presidentja.
Ndërkohë ajo ka njoftuar se ka taka takuar me zonjën e parë Jill Biden, me të cilën kanë ndarë kujtimet nga vizita e Presidentit Biden dhe familjes së tij në Kosovë.
“Si presidente e Kosovës, në mars të vitit 2016, në Shtëpi të Bardhë i pata dorëzuar zotit Biden dekretin për emërimin e rrugës që lidh kryeqytetin e Republikës tonë me kampin ushtarak amerikan Bondsteel, si nderim në emër të popullit të Kosovës për kontributin e familjes Biden për lirinë dhe pavarësinë e Kosovës. Ishte ndër momentet më emocionuese të mandatit tim, të cilin e kujtoj me shumë krenari.
Sot, kjo rrugë qëndron si simbol i miqësisë të palëkundur me SHBA-të dhe përkushtimit të popullit të Kosovës për ta zhvilluar vendin si një vend të lirë, demokratik, të palëkundur në partneritetin tonë, të bazuar në vlerat tona të përbashkëta.
E falenderova Dr. Biden për angazhimin e vazhdueshëm amerikan në Kosovë dhe nënvizova nevojën që ky angazhim të intensifikohet”, ka shkruar Jahjaga.
