Pejë- Ish-shefi i Shërbimit Pronësor Juridik, në Drejtorinë për Kadastër dhe Gjeodezi, në Klinë, Ymer Mërlaku e ka kundërshtuar aktakuzën e Prokurorisë së Pejës, të cilin e ngarkon për keqpërdorim të detyrës zyrtare lidhur me bartjen e pronës shoqërore në atë private.
I pandehuri kundërshtimin e akuzës e bëri në seancën e shqyrtimit të dytë pranë Gjykatës së Pejës, në të cilin parashtroi se akuza ndaj tij nuk kishte bazë ligjore dhe kjo akuzë ishte si pasojë e mos studimit të duhur të lëndës nga ana e Prokurorisë.
“Provat që janë marrë nga ana e Prokurorisë nuk janë marrë në harmoni me ligjin pasi që nuk është studiuar mirë çështja e bartjes së pronës. Unë kurrë në jetën time nuk kam pasur interes material”
Ai poashtu e cilësoi joligjore edhe bastisjen e realizuar nga ana e policisë, ku ndër të tjera i pandehuri pretendoi se kundërligjshmëria e bastisjes kishte të bënte me bastisja nuk ishte bërë me njoftim paraprak dhe në mungesë të personave kompetent.
Në anën tjetër, Prokurorja Lumturije Vuqetaj kërkoi nga gjykata që pretendimet i të pandehurit për hedhjen e aktakuzës t’i refuzoj si të pabazuara dhe se mbetet pranë përgjigjes me shkrim të cilat i kishte paraqitur kundrejt pretendimeve të pandehurit.
Meqënse ishte pretendimi i të pandehurit se bastisja ishte bërë në mënyrë joligjore, gjykatësja Nushe Kuke-Mekaj kërkoi nga prokurorja të konfirmonte nëse bastisja ishte bërë para se të fillonin hetimet.
Si rrjedhojë e kësaj, gjykatësja konstatoi se bastisja ishte realizuar një vit para se të fillonin hetimet ndaj të pandehurit.
Gjykatësja njoftoi se lidhur me vendimin në lidhje me kërkesën për kundërshtimin e provave do të njoftohen palët.
Ndryshe, me me 7 shtator 2022 Ish-shefi i Shërbimit Pronësor Juridik, në Drejtorinë për Kadastër dhe Gjeodezi, në Klinë, Ymer Mërlaku, ishte deklaruar i pafajshëm për akuzën për korrupsion.(
Ndryshe, sipas akuzës së ngritur nga Prokuroria Themelore në Pejë, më 12 gusht 2022, i akuzuar Ymer Mërlaku ngarkohet se më 12 mars 2015, në Drejtorinë e Kadastrës, Gjeodezisë dhe Pronës në Klinë, në cilësinë e personit zyrtar, tejkalon kompetencat e tij me qëllim që t’i mundësojë personit tjetër përfitimin e dobisë pasurore, raporton Betimi për Drejtësi.
Sipas aktakuzës, thuhet se në kohën dhe vendin e lartcekur, në cilësinë e shefit të Shërbimit Pronësoro-Juridik në Klinë, duke vepruar sipas kërkesës së parashtruesit Milovan Pashiq, nxjerr vendim nën nr. 11-950-41/2015, më 24 mars 2015, me të cilën miraton kërkesën e të njëjtit duke ia njohur të drejtën e pronësisë, në Grobosh, ZK-Dollc, pronë kjo e regjistruar si pronë shoqërore, e që është nën administrimin e plotë të Agjencisë së Kosovës për Privatizim, duke i mundësuar kështu të lartcekurit të përfitojë pronësinë mbi atë ngastër kadastrale dhe njëherit duke i shkaktuar dëm AKP-së.
Për çka, në aktakuzë thuhet se ka kryer vepër e penale “Keqpërdorim i pozitës apo autoritetit zyrtar”, nga neni 422, të ish-KPRK-së.
