Interi raportohet se i është bashkuar garës me Milanin për të siguruar shërbimet e kapitenit të Manchester Cityt, Kyle Walker.
Të shtunën, Pep Guardiola konfirmoi se 34-vjeçari ka kërkuar largimin nga klubi pasi dëshiron ta përfundojë karrierën jashtë Anglisë.
Milani thuhet se ka besim të madh se do të sigurojnë shërbimet e anglezit, por tashmë edhe rivali i tyre lokal Interi po synon transferimin e tij.
Walker ka një karrierë të pasur si futbollist pasi ka fituar disa trofe të ndryshëm me Man Cityn, teksa numëron edhe 93 paraqitje për kombëtaren e Anglisë, gjë që ka bërë që ai të fitojë reputacion si njëri prej lojtarëve më të mirë të gjeneratës së tij.
Pas gjithçkaje që ai ka arritur në futbollin anglez, nuk është një befasi që Walker dëshiron ta përfundojë karrierën e tij jashtë vendit.
Raporti shton se përfaqësuesit e Walker, kontrata e të cilit skadon në vitin 2026, kanë qenë në kontakt me Interin së fundmi.
Mbetet të shihet nëse Walker i cili nuk u ftua në fitoren që City mori me rezultat 8-0 ndaj Salford në FA Cup ka luajtur ndeshjen e fundit për ekipin anglez.
