Në ambientet e Drejtorisë Komunale të Arsimit në Ferizaj u zhvillua tryeza e diskutimit me temë “Avancimi i performancës së shkollës bazuar në dëshmi: përvoja dhe praktika”, e organizuar nga Instituti Pedagogjik i Kosovës dhe Drejtoria e Arsimit. Ky aktivitet synon fuqizimin e bashkëpunimit ndërmjet IPK-së dhe Drejtorive Komunale të Arsimit, me qëllim përmirësimin e performancës së shkollave, me fokus të veçantë në zhvillimin e aftësive të lexim-kuptimit dhe lexim-shkrimit tek nxënësit.
Tryezën e hapi drejtori i DKA-së në Ferizaj, Afrim Llabjani, i cili falënderoi Institutin Pedagogjik për mbështetjen e vazhdueshme dhe përkushtimin në adresimin e sfidave në sistemin arsimor.
Ndërkaq, drejtori i IPK-së, Osman Buleshkaj, theksoi rëndësinë e përdorimit të të dhënave dhe bashkëpunimit ndërinstitucional për ngritjen e cilësisë në arsimin fillor dhe të mesëm.
Gjatë tryezës, hulumtuesi Bekim Morina prezantoi rezultatet e studimeve mbi strategjitë dhe metodat më efektive të mësimdhënies, me fokus në përmirësimin e lexim-kuptimit. Ai ndau të gjeturat nga hulumtimi, rekomandime konkrete dhe hapat që duhet të ndërmerren për të rritur efikasitetin e këtyre metodave në procesin mësimor, duke nxitur një diskutim të frytshëm dhe reflektues te pjesëmarrësit.
Bashkëpunëtori shkencor, njëherësh drejtor i Institutit, Osman Buleshkaj, ofroi informata për procesin e licencimit, vlerësimit të performancës dhe zhvillimit profesional të mësimdhënësve. Ai nënvizoi rëndësinë e përtrirjes së licencave të karrierës dhe theksoi rolin thelbësor të vlerësimit të brendshëm për avancimin e cilësisë së mësimdhënies në shkolla.
Gjithashtu, Tringa Dedi (shefe e Departamentit) dhe Zehrije Plakolli (hulumtuese) prezantuan programet e trajnimit që IPK-ja ofron për mësimdhënësit, duke theksuar rëndësinë e zhvillimit profesional të vazhdueshëm.
Në këtë takim morën pjesë përfaqësues të institucioneve arsimore: zyrtarë të DKA-së, drejtorë dhe mësimdhënës të shkollave, pedagogë dhe koordinatorë të cilësisë, të cilët ndanë përvojat, sfidat dhe propozimet për avancimin e lexim-shkrimit dhe zhvillimin profesional të mësimdhënësve.
Në fazën përmbyllëse, u diskutuan temat prioritare për bashkëpunim gjatë vitit shkollor 2025/2026 dhe drejtori Buleshkaj ftoi DKA-në dhe shkollat të identifikojnë fushat që kanë nevojë për mbështetje, duke theksuar nevojën për planifikim të përbashkët dhe krijim të rrjeteve profesionale mbështetëse.
Tryeza përfundoi me zotimin e përbashkët për një bashkëpunim të qëndrueshëm dhe të strukturuar ndërmjet Institutit Pedagogjik dhe Drejtorisë Komunale të Arsimit, me synim ngritjen e standardeve dhe cilësisë në arsimin fillor dhe të mesëm, si dhe përgatitjen e nxënësve për sfidat e kohës.
