Hyjnë në fuqi tarifat e reja të vendosura nga Presidenti Donald Trump ndaj dhjetëra partnerëve tregtarë të Amerikës, duke shënuar kështu një përshkallëzim të konsiderueshëm të tensioneve të vazhdueshme tregtare.
Çdo mall i vendit i nënshtrohej një tarife minimale prej 10%. Por normat ndryshojnë ndjeshëm nga një vend në tjetrin.
Tarifat më të larta të vendosura janë për mallrat nga Brazili (50%), Laosi (40%), Mianmari (40%), Zvicra (39%), Iraku (35%) dhe Serbia (35%).
21 vende të tjera përballen gjithashtu me taksa më të mëdha se 15%, sikurse janë Vietnami (20%), India (25%), Tajvani (20%) dhe Tajlanda (19%).
Mallrat nga India mund t’i nënshtrohen gjithashtu një tarife shtesë prej 25% të shtuar për shkak të një urdhri ekzekutiv që Trump nënshkroi të mërkurën, i cili kërkon të penalizojë Indinë për blerjen e naftës nga Rusia. Kjo tarifë e dytë është planifikuar të hyjë në fuqi më 27 gusht
.
Mallrat e tridhjetë e nëntë vendeve, si dhe të vendeve anëtare të Bashkimit Evropian, i nënshtrohen tarifave prej 15%, sipas një liste që Shtëpia e Bardhë publikoi javën e kaluar.
Përveç Kanadasë dhe Meksikës, të gjitha vendet e tjera nga të cilat SHBA-të importojnë mallra do të vazhdojnë të përballen me një tarifë minimale prej 10%, megjithëse me disa përjashtime.
Mallrat nga Meksika dhe Kanadaja përjashtohen nga tarifat nëse janë në përputhje me marrëveshjen e tregtisë së lirë SHBA-Meksikë-Kanada. Nëse jo, mallrat nga Meksika i nënshtrohen tarifave prej 25%, ndërsa mallrat nga Kanadaja i nënshtrohen tarifave prej 35%, nga 25% që ishte më parë.
