Afërdita Bunjaku, vajza e rreshterit Afrim Bunjaku, ka deklaruar në mbledhjen komemorative se babai i saj është flijuar për liri dhe për Kosovën.
Ajo u shpreh para të pranishmëve se babai e kishte mësuar, por asnjëherë “si të jetojmë pa ty”.
Fjalimi i plotë i saj:
Heroi im, babai im. Sa vështirë e kam të shkruaj për ty. babi im. Para kohe unë mbeta jetim, kurrë s’e kam besuar. Ikja jote babi, na la një plagë të madhe në zemrat tona. Babi s’e di si të jetoj pa ty, si të jetoj pa heroin tim.
Hyra brenda në shtëpi dhe ty s’të pashë. Është shumë e rëndë për mua. Vendin tënd në shtëpi s’e zëvendëson askush. Të gjitha na i besove, por si të jetojmë pa ty asnjëherë. Babi ishe njeri i dashur për familje, shoqërinë, ashtu edhe për punën ku flijove jetën për liri, për këtë vend. Që ne dhe Kosova të gjithë të jemi krenarë me ty me heroizmin tënd, mundin dhe punën qe e ke bërë çdoherë për ketë vend, të premtoj babi se do të jemi krenarë me ty.
Do të të ndjek gjithmonë në rrugën tënde, me mall e me dhimbje do të të kujtojmë heroi im, babai im.
Behrami: Bunjaku ishte shok, koleg e prijës i dalluar
Pjesëtari i Policisë së Kosovës, Avni Behrami, e ka kujtuar rreshterin Afrim Bunjaku si një shok, koleg e prijës të dalluar.
Në mbledhjen komemorative të mbajtur të hënën, ku të pranishëm ishin edhe krerët institucionalë, Behrami ka thënë se në natën kritike kanë qenë së bashku.
“Kemi shkuar me vetëmohim të madh, me besim të plotë që një ditë liria do të zbatohet në të gjitha pjesët e Kosovës. Afrimi ka qenë një shëmbëlltyrë shumë e veçantë, ka qenë shok, koleg, prijës i dalluar, duke i prirë çdo rasti. Edhe në natën kritike kemi qenë së bashku. Për fatin tim, ai paraprakisht ma ka dhënë një detyrë që të shkojë në vendin e quajtur “Ura e Bistricës”. Për fatin tim nuk kam qenë i pranishëm në momentin kritik. Përjetësisht mbase nuk do t’ia fal vetes që nuk kam qenë pranë tij, kurrë nuk do ta harroj, gjithmonë do ta kem në mendje dhe zemër. Lavdi i qoftë jetës dhe veprës së Afrim Bunjakut”, ka thënë ai.