Ministrja e Drejtësisë, Albulena Haxhiu, ka paralajmëruar një skemë punësimi ku do të punësoheshin gratë dhe vajzat të cilat janë viktima të dhunës në familje.
Ajo tha se për këtë nismë janë duke bashkëpunuar me ministrinë e Financave, për të parë se cilat janë masat që duhet marrë në mënyrë që kjo të realizohet.
“Së fundmi kemi qenë në komunikim me ministrin e Financave, në kuptimin që të adresojmë përveç masave që janë marrë për punësimin e grave, ta adresojmë edhe një masë tjetër që është për punësimin e viktimave të dhunës në familje, sepse vlerësojmë se është jashtëzakonisht e rëndësishme prandaj jemi në përgatitje të një konceptimi se si ta bëjmë të mundshme punësimin e vajzave dhe grave që janë viktima të dhunës”, ka thënë ajo.
Haxhiu tha se gratë fuqizohen vetëm “atëherë kur i pavarësojmë ekonomikisht”, teksa shtoi se ministria që e drejton ka marrë disa nisma bashkë me disa organizata për t’u dalë në ndihmë grave.
E para e drejtësisë, u shpreh se gratë janë të nënpërfaqësuara në tregun e punës, dhe se duke u referuar në disa raporte tha se pjesëmarrja e tyre në punësim është rreth 20%.
“Gratë në Kosovë, konsiderohen që janë të nënpërfaqësuara në tregun e punës, shifrat për këta variojnë nga raportet në raporte por rreth 20%, është pjesëmarrja e grave në tregun e punës. Shkalla e varfërisë është shumë më e madhe krahasuar me atë të burrave”, tha ajo.
Tutje ajo ka thënë se pushimi i lehonisë të rishikohet, dhe të jetë pushim prindëror në mënyrë që ky pushim të jetë obligativ edhe për babain dhe jo vetëm për nënën.
Kjo sipas saj do të pamundësonte diskriminimin e grave në punësim në instucione publike apo private.
