Ushtruesja e detyrës së Presidentes së Kosovës, Albulena Haxhiu, ka dekoruar me Medaljen Presidenciale të Meritave boksieren Donjeta Sadiku, për suksesin e saj të veçantë në Lojërat Mesdhetare.
Haxhiu ka vlerësuar kontributin e Sadikut në boks dhe përfaqësimin e denjë të Kosovës në arenën ndërkombëtare. Ajo ka theksuar se Sadiku, gjatë hapjes së Lojërave Mesdhetare në Taranto të Italisë, mbajti flamurin e Kosovës gjatë parakalimit të sportistëve, ndërsa pak ditë më vonë fitoi medaljen e artë në finale ndaj përfaqësueses së Serbisë, Kristina Kuluhova.
Sipas Haxhiut, kjo përbën një sukses historik për sportisten dhe Kosovën, ndërsa ajo ka përgëzuar edhe trajneren Marjola Sallauka dhe gjithë ekipin e Sadikut për këtë arritje.
Haxhiu i ka uruar Sadikut suksese të mëtejshme dhe medalje të tjera, duke e cilësuar atë si shembull të një sportisteje që e përfaqëson Kosovën me krenari dhe dinjitet.
