Deputeti dhe njëherit kryetari i Aleancës për Ardhmërinë e Kosovës, Ramush Haradinaj, ka thënë se deklaratat për rritje ekonomike, janë pa fakte, madje sipas tij, janë edje ofendim për një vend e për një popull të tërë.
Haradinaj duke prezantuar disa shifra, tha se rritja ekonomike sipas Bankës Botërore është 3.1% e jo siç e projektuan qeveritarët 10.5%. Sipas tij, Inflacioni po ashtu sipas Bankës Botërore, është 19.1%.
“Rritja ekonomike sipas Bankës Botërore është 3.1% e jo siç e projektuat ju 10.5%. Inflacioni, po ashtu sipas Bankës Botërore, është 19.1%. Kjo i bie se fuqia blerëse e qytetarit të Kosovës, është përgjysmuar. S’ka si të jetë ndryshe, kur janë shtrenjtuar gjithë artikujt e domosdoshëm për jetesë, e qeveria e ka bllokuar Ligjin e Pagave! E ka bllokuar edhe ndërtimin e kapaciteteve të reja energjetike, siç ishte “Kosova e Re” dhe gazsjellësi amerikan, me arsyetime qesharake, se megavati prej 80 eurove i dukej i shtrenjtë, e sot, çmimi i tij pothuajse është dhjetëfishuar”.
Ai tha se nga 706 milionë të planifikuara me buxhetin e shtetit për investime kapitale, janë realizuar vetëm një e dhjeta e tyre. Në çdo sferë ekonomike e sociale ka rënie drastike.
Sipas Haradinajt, rritje kanë shënuar vetëm importet e mallrave nga Serbia.
“Rritje kanë shënuar vetëm importet e mallrave nga Serbia. Kjo qeveri e ka kapërcyer çdo parashikim dhe importet nga Serbia prej 174 milionë në vitin 2020, kanë mbërritur në mbi 306 milionë euro, që është për 76 % më shumë nga viti paraprak. Prandaj deklaratat për rritje ekonomike, pa fakte, janë ofendim për një vend e për një popull të tërë”, ka shkruar Haradinaj.
Kryeministri Albin Kurti dy dityë më parë ka thënë se nën qeverisjen e tij në 1 vit e gjysmë udhëheqjeje deri tash, në aspektin ekonomik janë shënuar disa përparime.
Sipas tij, Kosova ka regjistruar progres ekonomik për të cilin thotë se “nuk është rastësi a hamendeshim, por rezultat i politikave të duhura dhe qeverisjes së mirë”.
Kurse ministri i Financave, Punës dhe Transfereve (MFPT), Hekuran Murati ka thënë dje se raporti import-eksport është përmirësuar dukshëm gjatë dy viteve të fundit.
Sipas tij, në vitin 2019, ky raport ishte 1:9, ndërkaq tani aktualisht është 1:6.
“Në vitin 2019, raporti eksport-import i mallrave ishte 1:9. Pra për çdo euro që merrej nga malli i eksportuar, nëntë euro mall importoheshin. Me rritjen enorme të eksportit dy viteve të fundit, ky raport është përmirësuar dukshëm dhe aktualisht është 1:6”, ka shkruar sot Murati në rrjetin social Facebook.
Ai tha se ky hendek do të zvogëlohet edhe më tej, falë masave mbështetëse për prodhuesit.
