Ministri në detyrë i Financave, Hekuran Murati, përmes një postimi në profilin e tij në Facebook, ka kritikuar menaxhimin e fondeve nga Komuna e Prishtinës.
“Ndërsa MASHTI po investon miliona euro në zhvillimin e infrastrukturës dhe shërbimeve në kryeqytet, Komuna e Prishtinës me përkrahjen e Përparim Ramës po shpenzon pa transparencë miliona për projekte që nuk i sjellin përfitim qytetarëve”, ka thënë Murati
Sipas Muratit, Ministria e Arsimit, Shkencës, Teknologjisë dhe Inovacionit ka alokuar 12 milionë euro investime në Komunën e Prishtinës, pavarësisht pengesave të vazhdueshme nga autoritetet komunale nën udhëheqjen e kryetarit Përparim Rama.
Ndërkohë, Komuna e Prishtinës ka shpenzuar po aq, 12 milionë euro, për tenderin e njohur si “Arkitekti i Qytetit”. Ky projekt ka ngjallur dyshime, pasi nuk ka transparencë se ku janë investuar këto fonde dhe cili është përfitimi konkret për qytetarët.
Qytetarët dhe ekspertët presin përgjigje nga Komuna lidhur me përdorimin e këtyre mjeteve dhe ndikimin e projektit në zhvillimin urban të kryeqytetit.
