Në ambientet e Friedrich-Ebert-Stiftung në Berlin u hap ekspozita “Rezistenca paqësore dhe shtetformimi në Kosovë 1988 – 1998”.
Hapjen e ekspozitës e bënë Ambasadori i Republikës së Kosovës në Gjermani, dr. Faruk Ajeti, dhe dr. Helene Kortländer, drejtuesja për Evropën Lindore e Fondacionit Friedrich Ebert. Ambasadori Ajeti theksoi rëndësinë e rezistencës paqësore për lirinë dhe pavarësinë e Kosovës. Ai u shpreh se „nën udhëheqjen e Presidentit Ibrahim Rugova, qytetatarët e Kosovës zgjodhën një rrugë të veçantë të rezistencës paqësore, një rrugë të unitetit, të durimit dhe shpresës. Rezistenca paqësore ishte një qasje e pazakontë për Ballkanin. Kjo politikë largpamëse duke krijuar institucionet paralele kundër represionit dhe brutalitetit serb ndikoi në ndërkombëtarizimin e çështjes së Kosovës. Rezistenca paqësore ishte më shumë se një betejë politike – ishte një përpjekje për të fituar mbështetjen e Perëndimit për aspiratat për pavarësi, me mjete paqësore, një politikë aspak e lehtë për atë kohë. Kjo pjesë e historisë më të re të Kosovës mbetet një pjesë qendrore e kujtesës sonë kombëtare dhe një dëshmi e vendosmërisë dhe guximit të shoqërisë sonë.“
Pas hapjes së ekspozitës, u zhvillua një panel diskutimi me temën “Toka e largët, konflikti aktual: Mosmarrëveshja serbo-shqiptare mbi Kosovën në vitet 1990 dhe sot“. Në këtë panel morën pjesë: kreatori i ekspozitës Shkumbin Brestovci, studiuesja Blerta Ismajli, dhe historiani Konrad Clewing.
Ekspozita u organizua nga Fondacioni Friedrich Ebert në bashkëpunim me Ambasadën e Republikës së Kosovës në Berlin, Österreichische Akademie der Wissenschaften dhe Leibniz-Institut für Ost- und Südosteuropaforschung.
Ekspozita do të qëndrojë e hapur deri më 25 tetor 2024 në ndërtesën e Fondacionit Friedrich Ebert, Hiroshimastraße 17-28, 10785 Berlin.
