Pjesëtarë të Forcës së Sigurisë së Kosovës kanë marrë pjesë në konferencën “European Partnership Flight”, të organizuar nga Forcat Ajrore të Shteteve të Bashkuara për Evropë, ka njoftuar ministri në detyrë i Mbrojtjes, Ejup Maqedonci.
Sipas tij, aktiviteti synon forcimin e bashkëpunimit ndërkombëtar dhe zhvillimin e kapaciteteve në fushën e aviacionit ushtarak.
“Gjatë konferencës u zhvilluan ligjërata profesionale, diskutime tematike dhe punë në grupe, ku përfaqësuesit e vendeve partnere patën mundësi të shkëmbejnë përvoja, praktika më të mira dhe ekspertizë në fushën e operacioneve ajrore dhe zhvillimit të kapaciteteve”, ka thënë Maqedonci.
Ai ka bërë të ditur se pjesëmarrësit kanë realizuar edhe një vizitë në Bazën Ajrore të Kuçovës, në Republikën e Shqipërisë.
Sipas Maqedoncit, gjatë vizitës ata janë njohur nga afër me kapacitetet dhe zhvillimet në këtë infrastrukturë ajrore, si dhe kanë zhvilluar aktivitete për forcimin e partneriteteve dhe bashkëpunimit profesional.
“Pjesëmarrja e FSK-së në këtë konferencë është dëshmi e angazhimit të vazhdueshëm për ngritjen e kapaciteteve profesionale, rritjen e ndërveprueshmërisë dhe thellimin e bashkëpunimit me partnerët strategjikë, në funksion të ndërtimit të një force moderne dhe të aftë për të kontribuar në sigurinë rajonale dhe ndërkombëtare”, ka shkruar Maqedonci në rrjetet sociale.
