Universiteti i Prishtinës ka hapur konkurs për bursat studentore të vitit akademik 2024/’25 në nivelin bachelor të studimeve.
Konkursi për bursa është i hapur nga 3 deri më 17 mars 2025, në orën 15 e 30.
Të drejtë konkurrimi kanë studentët e rregullt të fakulteteve të Universitetit të Prishtinës, të vitit të dytë e më lart, që nuk kanë ndonjë vit të përsëritur. Aplikuesit e bursave gjithashtu duhet të kenë kryer provimet e parapara të vitit akademik 2023/’24 në afatin e shtatorit të po atij viti dhe të kenë notën mesatare 9.00.
Studentët e fakulteteve të Ndërtimtarisë, Arkitekturës, Inxhinierisë Mekanike, Inxhinierisë Elektrike dhe Kompjuterike dhe ata të Fakultetit të Shkencave Matematike-Natyrore nga departamentet e Matematikës dhe Fizikës, mund të aplikojnë edhe me notë mesatare më të ulët, por ajo nuk duhet të jetë nën 8:00.
Kriteret dhe procedurat e aplikimit për bursa, më gjerësisht dhe në tërësi, mund t’i lexoni këtu.
Universiteti i Prishtinës që sivjet festoi 55 vjetorin e themelimit, është institucioni më i madh, më i vjetër, më i suksesshëm në Kosovë dhe i rendituri më së larti në platformat prestigjioze ndërkombëtare nga të gjitha universitetet në gjuhën shqipe të hapësirave gjeografike ku jetojnë shqiptarët.
