Gjykata Komerciale e Kosovës – Dhomat e Shkallës së Dytë ka marrë vendim përfundimtar, me të cilin Radio Televizioni i Kosovës obligohet t’i paguajë shtëpisë prodhuese N.SH. “Grand Media” një shumë prej mbi 790 mijë eurosh, si pasojë e shkëputjes së njëanshme dhe të kundërligjshme të kontratës për emisionin “Kush do të bëhet Milioner”.
Sipas aktgjykimit K.DH.SH.II.nr.1562/24, të datës 16 tetor 2025, trupi gjykues i përbërë nga gjyqtarët Fisnik Nuli (kryesues), Ramush Bardiqi dhe Krenar Berisha ka aprovuar pjesërisht ankesën e paditësit, duke ndryshuar vendimin e shkallës së parë dhe duke e rritur ndjeshëm obligimin financiar ndaj RTK-së.
Me vendimin e formës së prerë, RTK detyrohet t’i kompensojë “Grand Media”-s: 340,808 euro për dëmin e shkaktuar nga ndërprerja e kontratës; 32,933.54 euro për emisionet e prodhuara dhe të transmetuara, por të papaguara; si dhe 408,969.60 euro për 24 emisione të realizuara, por të pa transmetuara, të cilat ishin refuzuar në mënyrë të njëanshme nga transmetuesi publik.
Në total, shuma që RTK duhet të paguajë arrin në 782,701.54 euro, si dhe 7,251.50 euro për shpenzimet e procedurës kontestimore, përfshirë edhe kamatën ligjore që llogaritet nga data 28 maj 2014 deri në ekzekutimin e plotë të pagesës.
Në arsyetimin e vendimit, Dhoma e Shkallës së Dytë ka vlerësuar se RTK e ka ndërprerë kontratën pa respektuar procedurat e përcaktuara, pa paralajmërim dhe pa nënshkrimin e ndonjë aneks-kontrate, duke shkelur nenin 14 të marrëveshjes.
Gjykata ka theksuar se arsyet financiare apo ndryshimet ligjore nuk e përjashtojnë përgjegjësinë kontraktuale të RTK-së, përderisa kontrata ishte ende në fuqi dhe nuk ishte shkëputur sipas formës ligjore.
Po ashtu, është refuzuar ankesa e RTK-së, me të cilën kërkohej që detyrimi financiar të kufizohej në rreth 32 mijë euro, duke u cilësuar si e pabazuar dhe në kundërshtim me provat dhe ekspertizat financiare të administruara në proces.
Ky vendim përmbyll një proces gjyqësor që kishte nisur qysh në vitin 2014 dhe ndaj tij nuk lejohet ankesë e mëtejme, duke e bërë aktgjykimin të plotfuqishëm dhe të ekzekutueshëm.
