Gjykata e Vranjës në Serbi nuk ka lejuar premierën për dy filmat shqiptarë, “Heshtja vret” dhe “I pabesi”, kjo si pasojë pasi financuese e këtyre dy filmave është Republika e Kosovës.
Producenti i këtyre dy filmave, Gani Veseli, ka thënë se, “këta filma tashmë kanë marrë një epilog krejt ndryshe që as vetë s’e kisha pasur menduar”.
“Sot po ballafaqohem me drejtësinë atje në Serbi, për dy filma. Këta dy filma ishin të planifikuar për premierë në Bujanovc, “Heshtja vret” dhe “I pabesi”, paralel që të jepen të dy filmat”, vijon Veseli.
Tutje, Gani Veseli ka thënë se “një natë para se me u shfaqë filmat, u morëm në biseda informative dhe na u ndal premiera që të jepet në Bujanovc dhe pastaj e mori në dorë prokurorja e lartë, e tashmë ka hyrë në lojë edhe Ministria e Kulturës në Serbi”.
Ndër të tjera, përgjatë një emisioni në TV Dukagjin, ai ka thënë se është rasti i parë që ndodh diçka e tillë.
“Është rast unik që për herë të parë po mbahet diçka për film në Gjykatë”, është shprehur Veseli.
Sipas tij, pas thirrjes së seancës së parë, është paraparë që të mbahet edhe seanca e dytë në muajin e ardhshëm.
“Seanca e dytë është vendosur më 4 gusht, që Gjykatësja të kërkojë nga komisioni se si e kanë parë filmin, e kanë parë me titra filmin dhe t’ia sjellin Gjykatës, edhe kjo paralel ta shofim filmin edhe një herë që të mos marrin ndonjë vendim qoftë për të mirë ose për të keq, edhe pse dyshojë në këtë gjë”, ka thënë Veseli.
