Një person është gjetur pa shenja jete në një shtëpi në rrugën “Obria” në Prishtinë.
Lajmin e ka konfirmuar zëdhënësi i policisë për rajonin e Prishtinës, Enis Pllana, i cili bëri të ditur se rasti është raportuar rreth orës 11:30.
“Sot, rreth orës 11:30 kemi pranuar informatën se një person pa shenja jete gjendet në një shtëpi në rrugën ‘Obria’ në Prishtinë. Vdekjen e viktimës (mashkull) e ka konstatuar ekipi mjekësor në vendin e ngjarjes”, deklaroi Pllana.
Ai shtoi se policia, në koordinim me prokurorin e shtetit, ka nisur hetimet për ndriçimin e plotë të rastit.
“Policia në koordinim me prokurorin e shtetit ka nisur një hetim mbi vdekjen si dhe po vazhdon me ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si edhe sqarimin e plotë të rrethanave të rastit”, tha ai.
Njësitet policore janë duke punuar për të zbardhur shkaqet e kësaj ngjarjeje.
