Kjo është e para në një seri imazhesh të hapësirës së thellë që do të publikohen këtë javë
Presidenti amerikan Joe Biden publikoi mbrëmë një nga imazhet e para të marra nga teleskopi hapësinor James Webb, i cili tregon pamjen më të thellë të hapësirës të marrë ndonjëherë dhe konsiderohet një pikë kthese në mënyrën se si njerëzit vëzhgojnë universin.
I pari në një seri imazhesh të hapësirës së thellë që do të publikohen këtë javë tregon SMACS 0723, një grumbull galaktikash që zmadhon universin më të thellë pas tij nga perspektiva e Tokës.
“Është fotografia më e thellë e universit tonë që është bërë ndonjëherë,” tha shefi i NASA-s Bill Nelson në një prezantim të mbajtur në Shtëpinë e Bardhë, sipas CNN-it.
Zëvendëspresidentja Kamala Harris tha se ky teleskop është një nga arritjet më të mëdha inxhinierike dhe një dëshmi e përkushtimit të atyre që punuan në këtë projekt për muaj të tërë.
“Kjo pjesë e universit të gjerë mbulon një pjesë të qiellit në madhësinë e një kokrre rëre që dikush në tokë e mban në pëllëmbën e dorës së tyre,” thuhet në një deklaratë të NASA-s, duke shtuar se disa nga këto galaktika të largëta dhe grupime yjesh nuk janë parë kurrë më parë.
Imazhi i kapur nga kamera infra e kuqe e Webb-it përbëhet nga imazhe të marra në gjatësi vale të ndryshme të dritës për 12.5 orë. Teleskopit Hapësinor Hubble iu deshën javë të tëra për të fotografuar fushat më të thella.
Pjesa tjetër e imazheve me ngjyra me rezolucion të lartë do të zbulohet më vonë sot, të gjitha do të transmetohen drejtpërdrejt në faqen zyrtare të NASA-s.
