Pas përfundimit të takimeve në Zyrën e Punës së Presidencës në Dolmabahçe, delegacionet e Rusisë dhe Ukrainës janë larguar duke lënë pas një takim të rëndësishëm diplomatik, të zhvilluar me ndërmjetësimin e Turqisë dhe Shteteve të Bashkuara të Amerikës, transmeton KosovaNews.
Ministri i Jashtëm turk, Hakan Fidan, njoftoi përmes një postimi në rrjetet sociale se takimi i sotëm ishte “një ditë e rëndësishme për paqen botërore”, duke bërë të ditur se si rezultat i përpjekjeve intensive diplomatike, palët janë pajtuar për disa hapa konkretë.
“Sot ishte një ditë e rëndësishme për paqen botërore. Si rezultat i përpjekjeve intensive diplomatike, delegacionet e Rusisë dhe Ukrainës zhvilluan një takim në Stamboll, me ndërmjetësimin e Turqisë. Si rezultat i këtij takimi, u arrit marrëveshja për shkëmbimin e nga një mijë personave nga të dyja palët, si një masë për ndërtimin e besimit”, ka deklaruar Fidan.
Ai ka shtuar se palët gjithashtu janë dakorduar të ndajnë në mënyrë të shkruar me njëra-tjetrën kushtet që do të mundësonin një armëpushim të mundshëm, si dhe kanë shprehur gatishmëri për të vazhduar dialogun në takime të tjera të ardhshme.
Zelenski: Ukraina gati për hapa të shpejtë drejt paqes – nëse Rusia refuzon armëpushimin, duhet të ketë sanksione të ashpra
Ndërkaq, menjëherë pas përfundimit të takimeve, Presidenti i Ukrainës, Volodymyr Zelenski, tha se “Ukraina është e gatshme për hapa të shpejtë drejt paqes.”
Gjatë qëndrimit të tij në Samitin e Komunitetit Politik Evropian që po mbahet në Tiranë, Zelenski shtoi se nëse Rusia e refuzon armëpushimin, atëherë duhet të vendosen sanksione të ashpra kundër saj.
“Ukraina është e gatshme për hapa të shpejtë drejt paqes,” tha ai, duke nënvizuar se vendi i tij nuk po kërkon zgjatje të konfliktit, por një zgjidhje të qëndrueshme dhe të drejtë.
“Nëse Rusia e refuzon armëpushimin, duhet të ketë sanksione të ashpra. Vetëm përmes presionit të bashkuar mund të arrihet një paqe e drejtë,” u shpreh ai.
Medinski: Po përgatitet një shkëmbim i madh robërish mes Rusisë dhe Ukrainës – negociatat për armëpushim do të vazhdojnë
Nga ana tjetër, edhe kreu i delegacionit rus në bisedimet për paqe me Ukrainën, Vladimir Medinski, ka konfirmuar se së shpejti pritet një shkëmbim i madh robërish midis dy vendeve.
“Së shpejti do të realizohet një shkëmbim i madh robërish, një mijë për një mijë persona,” tha Medinski, duke konfirmuar një deklaratë të mëhershme të delegacionit ukrainas mbi marrëveshjen për shkëmbimin.
Medinski vlerësoi rezultatet e bisedimeve si pozitive. “Në përgjithësi jemi të kënaqur me rezultatet e arritura në negociata dhe jemi të gatshëm të vazhdojmë kontaktet,” deklaroi ai për mediat.
Ai gjithashtu bëri të ditur se raundi i ardhshëm i bisedimeve do të fokusohet më konkretisht në çështjen e armëpushimit.
“Rusia dhe Ukraina do t’i paraqesin në detaje qëndrimet e tyre për një armëpushim të mundshëm dhe më pas negociatat do të vazhdojnë,” u shpreh ai.
Bisedimet në Stamboll po vlerësohen si një hap i rëndësishëm në përpjekjet për t’i dhënë fund konfliktit që ka shkaktuar mijëra viktima dhe ka zhvendosur miliona njerëz që nga nisja e agresionit rus në shkurt 2022.
