Në Ferizaj ka filluar nënshkrimi i peticionit për ndërtimin e stadiumit nga “KF Frizaj”.
Në një njoftim në Facebook, “KF Frizaj”, ka bërë të ditur se ka filluar nënshkrimi i peticionit për ndërtimin e stadiumit të qytetit “Ismet Shabani”.
Kjo iniciativë e komunitetit futbolldashës dhe qytetarëve ferizajas vjen pas shumë kërkesave të mëhershme dhe hasjes në veshë të shurdhër të pushtetarëve lokal e qendrorë.
Njoftim i plotë:
PETICION: Ferizaj do stadiumin tek Palestra e Sporteve
Ka filluar të nënshkruhet peticioni për ndërtimin e stadiumit të qytetit “Ismet Shabani” në lokacionin prapa palestrës së sporteve, me iniciativën e komunitetit futbolldashës ferizajas dhe pas shumë kërkesave të mëhershme dhe hasjes në veshë të shurdhër të pushtetarëve lokal e qendrorë.
Dmth është kërkesë e gjithë komunitetit futbolldashës dhe qytetarëve në përgjithësi që stadiumi të jetë në atë lokacion e jo e një subjekti në veqanti.
Duhet ndarë çëshjen e privatizimit të klubit Fc Ferizaj me ndërtimin e stadiumit, sepse janë dy çështje krejt të ndryshme asgjë nuk kanë të bëjnë njëra me tjetrën.
Qytetarëve u intereson ndërtimi i një stadiumi për të gjithë qytetarët dhe për nevoja të të gjitha klubeve e me kritere të UEFA dhe FIFA i nivelit ndërkombëtarë tek lokacioni (prapa Palestrës së Sporteve) në fjalë, pronë e cila është nën menagjimin e AKP-së.
Qeveria Kurti nuk është duke ia bartur pronën në fjalë Komunës së Ferizajt për arsye se nuk është duke i besuar qeverisjes lokale të PDK-së në menagjimin e kësaj prone, por qeveria Kurti nuk duhet të injorojë vullnetin e qytetarëve për një projekt siç është stadiumi i qytetit për inat politik.
Ky lokacion është shumë i përshtatshëm për një projekt të tillë dhe kjo më që moti është thellë e ngulitur në kokat e ferizajasve se aty do të jetë stadiumi i qytetit, për këtë mendimin profesional e kanë dhënë më së miri arkitektët e nuk mund ta japin politikanët.
Nëse qeveria Kurti nuk po i beson qeverisë lokale le ta ndërtojë dhe menaxhojë vetë këtë stadium por mos ta injorojë vullnetin e ferizajasve dhe komunitetit futbolldashës sepse çdo vonesë është e tepërt dhe humbës janë vetëm qytetarët të cilëve u sherben qeveria!
Ndihmë të madhe në zgjidhjen e kësaj çështje duhet të jenë deputetët e Kuvendit të Kosoves nga qyteti ynë Ferizaj, duke bërë presion te qeveria për ndërtimin e stadiumit të qytetit, sidomos deputetët e VV-së të cilët aksidentalisht janë bërë deputetë por nuk janë duke e kuptuar!
Pra qytetarë nënshkruajeni PETICIONIN.
