Ministri i financave, Hekuran Murati pas mbledhjes se Qeverisë në një konferencë për media ka dhënë detajet e para në lidhje me projektligjin për reformat pensionale që siguron se punëtorëve të viteve të 90’ta do t’iu njihen kontributet.
Murati tha se me kriterin për 15 vjet përvojë pune para luftës, për t’u kualifikuar si pensionist kontributdhënës, janë diskriminuar shumë persona që dhunshëm janë larguar nga puna në vitet 90’.
Ai tha që ligji parasheh qe dikush që ka punuar deri në vitin 1990 dhe ka pasur 10 vite kontribute, ku me legjislacionin aktual merr vetëm pensionin bazik prej 100 euro, por tash me këtë ndryshim parasheh që atyre personave që kane punuar do te njihet periudha e punës prej që nga janë larguar nga puna deri më datën 1 janar 1999.
“Më këtë ndryshim ne po e zhbëjmë atë diskriminim sepse do t’u mundësohet që për periudhën nga koha kur janë larguar nga puna e deri më një janar 1999, t’u llogaritet drejt plotësimi i kushtit prej 15 vjetësh e lartësia e pensionit do të caktohet varësisht nga vitet që kanë kontribuar, hiqet kjo preja prej 15 vjetësh. Pavarësisht kësaj do të gjejmë mënyra dhe mjete të nevojshme për ta përballuar si buxhet por edhe si Qeveri sepse konsiderojmë që është një e drejtë që i është mohuar tash e sa vite dhe duhet të rregullohet përfundimisht”, është shprehur Murati.
“Për ta sqaruar bëhet fjalë edhe për ata që kanë dalë ne pension, d.m.th. dikush që tash i ka 67 vite dhe që dy vite është duke marrë pensionin bazik, pra mund të ri aplikojë dhe të kalojë nga skema bazike në skemën parciale të pensionit kontribute pagues të moshës me plotësimin e kushteve që parashihet në ligj”, tha ndër tjerash Ministri.
Sipas tij nga ky ndryshim do të përfitojnë rreth 70 mijë pensionistë.
“Nga ky ndryshim plotësim, teorikisht parashihet që të përfitojnë rreth 104 mijë persona që do të plotësonin kushtin për të përfituar nga ky ndryshim, megjithatë duhet të kemi parasysh që disa mund të kenë ndërruar jetë e disa të mos e kenë arritur ende moshën e pensionimit, por aktualisht në skemën e pensionit bazik duhet të jenë rreth 70 mijë persona që do të duhej të kualifikoheshin për pensionin parcial kontributpagues të moshës”, është shprehur Murati.
Murati theksoi se punëtorët e viteve 90’ta duhet të dëshmojë që kanë pasur kontribute pensionale si dhe janë larguar nga puna dhe për shkak të largimit nga puna nuk kanë arritur ta plotësojnë ligjin prej 15 vitesh.
