Gjykata Themelore në Mitrovicë ua ka vazhduar masën e paraburgimit edhe për dy muaj, ish-nënkryetarit të Skenderajt, Nuredin Lushtakut, Arif e Faton Lushtakut, të dyshuar se kanë sulmuar dy zyrtarë policorë në Skenderaj.
Lajmin e ka konfirmuar për “Betimi për Drejtësi“, zyrtari për media i Gjykatës Themelore të Mitrovicës, Nusret Hoxha.
“Paraburgimi u është vazhduar edhe për dy muaj, seanca është mbajtur dje”, tha Hoxha.
Ndryshe, Nuredin Lushtaku, Arif e Faton Lushtaku janë në paraburgim që nga 4 korriku 2022.
Vendimin e Themelores për caktimin e paraburgimit ndaj tre të dyshuarve, e kishte vërtetuar Apeli më 20 krrik 2022.
Sipas prokurorisë pas përleshjes që familja Lushtaku kishte pasur me zyrtarët policorë, Nuredin Lushtaku, ish-nënkryetar i Skenderajt, ia kishte dërguar armën e policit Enver Berisha, ish-kryetarit të komunës Bekim Jasharit e pastaj ky i fundit e kishte dorëzuar në Polici.
Prokuroria ka thënë se Nuredin Lushtaku kishte shkuar me dy vëllezërit e tij pasi i kishte thirrë djali i tij pas një dënimi që i kishin shqiptuar zyrtarët policorë.
Me këtë, të njëjtit dyshohen se kanë kryer veprat penale “Sulmi ndaj personit zyrtar”, “Përdorimi i armës apo mjetit të rrezikshëm”, si dhe “Mbajtja në pronësi, kontroll ose posedim të paautorizuar të armëve”.
Ndryshe, Nuredin Lushtaku ishte vetdorëzuar në polici, pas njoftimit të prokurorisë se i njëjti është në kërkim.
