Një ngjarje tragjike ka ndodhur pasditen e së martës në liqenin e Shkodrës, ku kapiteni i një anijeje turistike humbi jetën gjatë një akti heroik.
Sipas Policisë, ngjarja ndodhi rreth orës 16:32, kur shtetasi A. A., 51 vjeç, kapiten i anijes në pronësi të Bashkisë Shkodër, u mbyt gjatë përpjekjes për të shpëtuar dy turistë që kishin rënë në ujë.
“Dyshohet se kapiteni A. A., gjatë përpjekjes për të shpëtuar dy turistë që kishin rënë në ujë, është mbytur.
Turistët janë shpëtuar dhe ndodhen në gjendje të mirë shëndetësore”, thuhet në njoftimin zyrtar të Policisë.
Menjëherë pas njoftimit, shërbimet policore shkuan në vendngjarje dhe po vazhdojnë kërkimet për gjetjen e trupit të viktimës.
Grupi hetimor është duke punuar për të sqaruar rrethanat e plota të ngjarjes.
