Komiteti i Trashëgimisë Botërore të UNESCO-s, në një draft dokument të miratuar gjatë takimit vjetor të 47-të mbajtur në Paris, bën thirrje që rajoni i Ohrit të vendoset në Listën e Thesareve Natyrore dhe Kulturore Botërore në Rrezik.
Projektvendimi thekson se degradimi i atributeve që e kanë vendosur rajonin e Ohrit si trashëgimi e mbrojtur nga UNESCO vazhdon dhe kërkon respektim të vëzhgimeve të Misionit të Monitorimit Reaktiv nga viti i kaluar.
Dokumenti bën thirrje për veprim serioz nga Shqipëria dhe Maqedonia e Veriut për të shpëtuar dhe rikuperuar një zonë me vlera të mëdha, duke iu kërkuar të dy vendeve që të punojnë për të forcuar dialogun ndërkufitar, si në nivel të lartë institucional ashtu edhe në atë operacional, për të siguruar qeverisje efektive dhe të qëndrueshme të rajonit.
Kërkohet që të dy shtetet të hartojnë një propozim për gjendjen ideale që duhet të arrihet, për ta hequr rajonin nga lista e rrezikut.
Po ashtu, Shqipërisë dhe Maqedonisë së Veriut i kërkohet të përgatisin një grup masash korrigjuese për të adresuar problemet, duke përdorur si bazë rekomandimet nga misionet monitoruese të viteve 2020 dhe 2024.
“Palët Shtetërore që t’i paraqesin Qendrës së Trashëgimisë Botërore, deri më 1 shkurt 2026, një raport të përditësuar mbi gjendjen e ruajtjes së pasurisë dhe mbi zbatimin e masave të mësipërme, për shqyrtim nga Komiteti i Trashëgimisë Botërore në sesionin e tij të 48-të”, thuhet në raport/ rtsh
