Instituti Kombëtar i Shëndetësisë Publike të Kosovës (IKSHPK) ka lëshuar një njoftim sensibilizues për qytetarët, duke bërë thirrje për kujdes të shtuar ndaj sigurisë ushqimore gjatë muajve të verës, për shkak të rritjes së rrezikut të helmimeve ushqimore.
Sipas IKSHPK-së, temperaturat e larta gjatë verës krijojnë kushte të favorshme për shumimin e mikroorganizmave të dëmshëm, duke bërë që ushqimi të prishet më lehtë dhe të rrezikojë seriozisht shëndetin e konsumatorëve.
Çfarë është siguria ushqimore dhe pse është e rëndësishme?
Siguria ushqimore nënkupton mbrojtjen e ushqimit nga çdo formë kontaminimi që mund të dëmtojë shëndetin e njerëzve. Rreziqet kryesore përfshijnë bakteret, viruset, parazitët, kimikatet e dëmshme, si dhe ndotjet fizike si kocka, fije floku apo copa metali.
Kontaminimi mund të vijë nga:
Duart e papastra
Ushqimet e tjera të ndotura
Uji i pasigurt
Insektet apo kafshët shtëpiake
Simptomat e helmimit ushqimor
Helmimet ushqimore paraqiten zakonisht shumë shpejt pas konsumimit të ushqimit të kontaminuar dhe përfshijnë:
Temperaturë
Dhimbje barku
Të vjella
Barkqitje
Si të mbroni veten dhe familjen tuaj?
IKSHPK rekomandon këto masa parandaluese për të siguruar një verë të shëndetshme dhe pa probleme:
Gatuani mirë ushqimin – sidomos mishin, vezët dhe qumështin; temperatura e brendshme duhet të arrijë 70°C.
Konsumoni ushqimin menjëherë pas përgatitjes – sa më gjatë të qëndrojë, aq më i madh është rreziku i kontaminimit.
Ruani ushqimin në temperatura të sigurta – mbi 60°C për ushqimin e nxehtë dhe nën 5°C për ushqimin e ftohtë.
Ringrohni mirë ushqimin para konsumit – sigurohuni që arrin përsëri 70°C.
Ndani ushqimin e papërpunuar nga ai i gatuar – përdorni mjete të veçanta për secilin (thika, dërrasa).
Lani duart rregullisht dhe si duhet – veçanërisht para përgatitjes së ushqimit dhe pas përdorimit të tualetit.
Mbani pastër mjedisin e kuzhinës – ndërroni rregullisht pecetat dhe leckat, dhe ziejini nëse ndoten.
Mbroni ushqimin nga insektet dhe brejtësit – përdorni enë të mbyllura.
Përdorni ujë të sigurt – vlojeni nëse dyshoni në cilësinë e tij.
Kontrolloni datën e skadimit dhe freskinë e produkteve.
Gjatë udhëtimeve apo piknikeve – përdorni frigoriferë dore apo enë termoizoluese.
Apel për qytetarët: Kujdesi juaj është mbrojtja më e mirë!
IKSHPK u bën thirrje qytetarëve që të respektojnë rregullat bazë të higjienës dhe përgatitjes së sigurt të ushqimit, për të parandaluar rrezikun e helmimeve gjatë verës.
“Vera e sigurt fillon nga kuzhina!” – është mesazhi përmbyllës i institutit, duke theksuar se shëndeti i familjes nis nga kujdesi i përditshëm në përgatitjen dhe ruajtjen e ushqimit.
