Komisioni Qendror i Zgjedhjeve (KQZ) ka bërë të ditur se gjatë periudhës së regjistrimit të votuesve jashtë vendit, nga 24 gushti deri më 26 dhjetor 2024, është vërejtur përdorimi i të njëjtës adresë e-maili nga persona të ndryshëm. Sipas KQZ-së, ky fenomen është evidentuar në mënyrë të dokumentuar, duke ngritur dyshime për manipulime të mundshme në procesin zgjedhor.
Zëvendësministri i Drejtësisë, Blerim Sallahu, ka reaguar duke theksuar se ky është një rast i qartë i manipulimit të votave, që nga regjistrimi e deri te plotësimi i fletëvotimeve në mënyrë të organizuar. Sipas tij, fakti që një adresë e-maili është përdorur nga shumë persona tregon një shkelje të qartë të procesit zgjedhor dhe rrezikon integritetin e zgjedhjeve.
Megjithëse më 11 dhjetor 2024 KQZ miratoi Procedurën Standarde të Veprimit për Regjistrimin dhe Votimin Jashtë Kosovës, e cila kufizon përdorimin e një adrese e-maili deri në katër herë, ky kufizim nuk ishte në fuqi për periudhën nga 24 gushti deri më 11 dhjetor 2024.
Faktet dhe provat e mbledhura konfirmojnë se ky fenomen i kundërligjshëm ka ndodhur mes 26 gushtit dhe 11 dhjetorit 2024. Megjithatë, Paneli Zgjedhor për Ankesa dhe Parashtresa (PZAP) nuk e ka shqyrtuar këtë provë, sikurse edhe prova të tjera të dorëzuara. Sipas Sallahut, këto fakte do të jenë një ndihmesë e rëndësishme për Gjykatën Supreme në marrjen e një vendimi të drejtë dhe të ligjshëm.
