Kryesia e fshatit Slivovë të Komunës së Ferizajt gjatë muajve të fundit kanë grumbulluar një shumë të caktuar të parave për ndërtimin e një objekti për të pame afër xhamisë së fshatit. Ndërkohë, një grup prej 10 personave kanë dërguar një kërkesë në komunë për ta kundërshtuar lokacionin e ndërtimit të këtij objekti.
Kjo ka bërë që komuna ta ndalon procesin e dhënies së lejes ndërtimore për kryesinë e fshatit.
Telegrafi ka kontaktuar me kryetarin e fshatit Slivovë, Njazi Rexhepi, i cili ka thënë se është shqetësuese të pengohet ndërtimi i objektit nga disa individ të moshave të reja.
“Ne deri më tash i kemi grumbulluar mjetet rreth 5 mijë euro për ta nisur projektin, ndërkohë banorët po vazhdojnë të sjellin ende para por e kemi ndërprerë aktivitetin derisa komuna ta lëshon lejen ndërtimore. Ne si kryesi e fshatit sëbashku me banorët kemi vendosur që objekti të ndërtohet afër xhamisë në pjesën e rrugës lokale ku ka hapësirë të mjaftueshme për parking dhe i plotëson kushtet, pastaj për këtë lokacion ka qenë në vend të ngjarjes edhe Këshilli i Bashkësisë Islame dhe janë pajtuar. Ndërkohë disa të rinj e kanë dërguar një ankesë dhe kanë kërkuar që objekti të ndërtohet përgjatë rrugës kryesore dhe tash jemi në pritje të vendimit të komunës”, ka thënë Rexhepi.
Telegrafi ka provuar të marrë një deklaratë nga njëri prej banorëve që e kishte kundërshtuar lokacionin për ndërtimin e objektit për të pame, por ai nuk ka pranuar të flas.
Ndërkaq, Sabri Murseli, drejtor për Pronë dhe Kadastër në Komunën e Ferizajt, ka thënë për Telegrafin, se ndërtimi i objektit për të pame në Slivovë ka mbetur peng i dy kërkesave të kundërta nga banorët.
“Ne jemi të gatshëm ta përkrahim iniciativën e këshillit dhe të banorëve të fshatit, por ndërkohë ka ardhur një kërkesë tjetër me disa nënshkrime për çështjen e lokacionit. Ne si komunë nuk mund ta lëshojmë lejen ndërtimore derisa banorët të merren vesh për këtë kontest. Ndryshe jemi të gatshëm ta përkrahim këtë iniciativë të qëlluar të këshillit të fshatit Slivovë”, ka thënë Murseli.
