Ndër krimet më të rënda të luftës, konsiderohet të jetë dhunimi seksual.
Mijëra raste të tilla, ndodhën në luftën e vitit 1998 – 1999 në Kosovë.
Të paktën për një prej tyre, autor është Zoran Vukotiq, i cili është dënuar me 13 vjet burgim, në prill të këtij nga gjykata e Apelit.
Në këtë rast, ka dëshmuar edhe një viktimë, e cila kishte rrëfyer tmerrin përjetuar.
Kështu, Vukotiq është bërë personi i parë i dënuar për dhunim seksual gjatë luftës, nga një gjykatë në Kosovë.
Ky rast, mbase i motivoi viktimat e tjera, që për të bëmat e Vukotiqit të kërkojnë drejtësi.
Prandaj, të mërkurën, Prokuroria Speciale njoftoi se ka ngritur edhe një aktakuzë të re për dhunim seksual kundër Zoran Vukotiq.
Edhe në këtë gjykim, pritet të dëshmoj një viktimë tjetër.
Përveç këtyre dy rasteve të dhunimeve seksuale, Vukotiq ka edhe disa raste të tjera për të cilat i është ngritur aktakuza.
“Aktakuza e parë kundër tij është ngritur në vitin 2017 nga një prokuror i EULEX-it dhe një prokuror vendor… Kundër tij janë katër raste aktive të cilat pritet të gjykohen”, ka deklaruar Amer Alija.
Amer Alija nga Fondi për të Drejtën Humanitare, tregon se gjatë luftës, Vukotiq ishte pjesë e policisë së Serbisë.
“Ai gjatë luftës është uniformuar si polic i Serbisë dhe qytetarët të cilët kanë jetuar para luftës dhe gjatë luftës në Vushtrri, e kanë identifikuar apo e kanë njohur mjaft mirë Vukotiqin, për arsye se ai ka punuar në Gjykatë Komunale”, ka thënë ai.
Vukotiq ishte arrestuar në Mal të Zi, prej nga ishte ekstraduar në Kosovë./rtvd
