Lëvizja Vetëvendosje është duke u organizuar që t’i mbajë zgjedhjet e saj të brendshme.
E kryetari aktual, i cili është edhe kryeministër, Albin Kurti, do të garojë edhe për një mandat 4-vjeçar në krye të këtoj subjekti politik.
Kurti ka shpalosur platformën e tij për mandatin e ri 4-vjeçar për drejtimin e organizatës politike.
Ai ka ftuar anëtarësinë që ta shfrytëzojnë të drejtën e tyre për të votuar në zgjedhjet e brendshme.
Kurti thotë se që nga ardhja në pushtet e LVV-së janë përballur me sfida të paparashikueshme.
“Pandemia dhe lufta në Ukrainë kanë ndikuar në shëndetin e qytetarëve dhe ekonominë e vendit. Fati ka dashur që ne të vijmë në qeverisje në kohën e këtyre dy problemeve. Kriza nuk na ka prekur vetëm neve por gjithë botën. Sidoqoftë ne jemi përgjegjës për vendin tonë”, tha Kurti, transmeton Telegrafi.
Ai thotë se Kosova mund të goditet nga këto kriza më shumë se shtetet e zhvilluara.
“Megjithatë ne jemi të duhurit për të qenë në krye të vendit në këtë kohë kritike”, tha Kurti.
Kryeministri i vendit thotë se organizata e LVV-së është çelësi i suksesit të qeverisjes.
Ai ka numëruar disa nga prioritetet e tij për mandatin tjetër në krye të LVV-së:
1) Rritja e numrit të anëtarëve të rinj me mosha të reja në LVV
2) Rritja e anëtarësisë së vajzave dhe grave
3) Krijimi i kohezionit mes brezave, grupeve shoqërore e botëkuptimore
4) Forcimi i shkollës politike dhe dimensionit ekzekutiv të saj
5) Promovimi i organizimit sindikal në sektorin privat
6) Përgatitja e burimeve njerëzore dhe programore për zgjedhjet lokale 2025
Reklama
7) Përgatitja e platformës politike për mandatin e dytë të qeverisjes
8) Rritja e rrjetit të qendrave të Lëvizjes Vetëvendosje në mërgatë
9) Angazhimi i studentëve dhe profesionistëve në organizatën politike të Lëvizjes
10) Bashkëpunimi ndërkombëtarë dhe ai jashtë shtetit e brenda kombit tonë
LVV do t’i mbajë zgjedhjet e saj të brendshme për të katërtën herë me radhë./Telegrafi/
