Shefi i Grupit Parlamentar të Partisë Demokratike të Kosovës, Abelard Tahiri, në seancën e sotme të Kuvendit i është drejtuar Qeverisë duke i kërkuar zgjidhje të situatës në veri të vendit, ku tash e disa ditë janë krijuar tensione pas largimit të serbëve nga institucionet e vendit.
Në fjalën e tij, Tahiri nuk e ka fajësuar Serbinë, por ka thënë se partia që është në pushtet është përgjegjëse për ta zgjidhur këtë problem, të cilin sipas tij, e kanë shkaktuar vetë.
Edhe Tahiri thekson se nuk po kërkon zgjedhje të reja, por zgjidhje të problemit.
Si opozitë Tahiri ka thënë se Qeverinë do ta mbështesin gjithmonë për vazhdimin e funksionimit të institucioneve në veri të Kosovës.
“E nderuara Qeveri, si opozitë ju mbështesim që të vazhdoni me funksionimin e institucioneve në atë pjesë të Kosovës. Jeni përgjegjës për moslejimin e kthimit të gjendjes para korrikut të vitit 2011. Jeni përgjegjës për moslejimin e kthimit të strukturave paralele në atë pjesë të vendit tonë”, ka deklaruar shefi i deputetëve të PDK-së.
Tahiri edhe në këtë rast ka përdorë Amerikën për të sulmuar Qeverinë.
Ai ka thënë se vendi nuk duhet ta vë në pikëpyetje miqësinë me Shtetet e Bashkuara të Amerikës, pas tensioneve të fundit për çështjen e targave.
“Koordinimi me SHBA-në është një prej proceseve që i ka dhënë më së shumti fuqizim shtetit të Kosovës dhe ne nuk duhet të konfrontohemi me ta. Gjithë këtë histori 20-vjeçare me SHBA-në nuk duhet ta vëmë në pikëpyetje”, ka thënë ai në Kuvend të enjten./KosovaNews/
