Shqipëria është duke u përgatitur për nisjen e bisedimeve me Greqinë për arritjen e një kompromisi për dërgimin e çështjes së përcaktimit të kufirit detar, në Gjykatën Ndërkombëtare të Drejtësisë, ka bërë të ditur të shtunën, ministrja e Jashtme Olta Xhaçka.
Të dy vendet kanë më shumë se dy vjet që kanë rënë dakord për t’ju drejtuar një gjykate ndërkombëtare, pasi përpjekjet e mëhershme për një zgjidhje bilaterale nuk çuan në një rezultat.
Xhaçka ka shpjeguar se po vijon puna teknike që do të çojë në negociatat e reja me Greqinë, synimi i të cilave këtë herë është që palët të bien dakord për pyetjet që do t’ia shtrojnë Gjykatës, apo pikat e mosmarrëveshjeve mes tyre, për të cilat duhet të kërkojnë interpretimin e Gjykatës.
Për të hyrë në këto bisedime, siç bëri të ditur Xhaçka, do të duhet që të merret autorizimi nga presidenti Bajram Begaj, për t’i dhënë plotfuqinë grupit negociator.
Pak javë më parë gjatë vizitës së tij të dytë në Tiranë brenda disa muajve, ministri i Jashtëm grek, Nikos Dendias, pati nxitur përshpejtimin e procesit për arritjen e kompromisit për dërgimin e çështjes në Gjykatën Ndërkombëtare të Drejtësisë.
Xhaçka ka deklaruar se me Greqinë po diskutohet një paketë çështjesh.
“Jemi duke diskutuar se si do të punojmë bashkërisht për të tejkaluar dhe adresuar shumë probleme që kemi trashëguar nga e kaluara, çështje që janë në interes të të dy vendeve tona. Kemi mirëkuptim për të trajtuar dhe zgjidhur të gjithë gamën e çështjeve që janë ende të pazgjidhura. Nuk bëhet fjalë vetëm për delimitimin e hapësirës detare, por dhe për çështje të tjera të trashëguara, siç është shfuqizimi i të ashtuquajturit ligj të luftës, si dhe efekteve juridike që rrjedhin prej tij, sa i takon të drejtave të pronësisë, por dhe çështjet e respektimit dhe mbrojtjes së të drejtave të njeriut, këtej dhe andej kufirit”, ka bërë të ditur Xhaçka duke njoftuar se “kemi punuar dhe kemi përfunduar, e janë për t’u ratifikuar dy marrëveshje të rëndësishme për riparimin dhe mirëmbajtjen e piramidave kufitare dhe për incidentet kufitare”./VOA
