Bregu i Fildishtë është fitues i Kupës së Afrikës në futboll. Turneun dramatik, Bregu i Fildishtë e mbylli me fitore po ashtu dramatike ndaj Nigerisë, të dielën mbrëma në Abidjan.
Bregu i Fildishtë, që organizoi Kupën e Afrikës, finalen e fitoi me rezultatin 2:1, me përmbysje të rezultatit. William Troost-Ekong kaloi në epërsi Nigerinë në minutën e 38-të.
Nikoqirët u kthyen fuqishëm në pjesën e dytë. Në stadiumin e stërmbushur me shikues, Franck Kessie barazoi rezultatin në 1:1 në minutën e 62-të. Golin e fitores dhe të festës së madhe e shënoi Sebastian Haller në minutën e 81-të.
Bregu i Fildishtë e ka fituar Kupën e Afrikës për herë të tretë. Për herë të parë kishte triumfuar në vitin 1992 e më pas edhe në vitin 2015.
Bregu i Fildishtë pati kampanjë shumë të veçantë. Grupin e kaloi vetëm si njëra prej përfaqësueseve më të mira të pozitës së tretë. Madje u kualifikua si e fundit. Humbjet nga Nigeria dhe Guinea Ekuatoriale, sollën shkarkimin e përzgjedhësit Jean-Louis Gasset. Emerse Fae udhëhoqi më pas Bregun e Fildishtë deri te trofeu.
Në 1/8 e finales, Bregu i Fildishtë e mposhti me penallti Senegalin. Në çerekfinale e kaloi Malin me gol në vazhdime, ndërsa në gjysmëfinale fitoi 1:0 ndaj Republikës Demokratike të Kongos me gol të Hallerit.
Kjo Kupë e Afrikës vlerësohet më e mira ndonjëherë.
