Zhvillohet sot në Shqipëri samiti BE-Ballkani Perëndimor, ku liderët e bllokut 27 vendesh dhe 6 vendet e Ballkanit Perëndimor do të mblidhen së bashku me zyrtarë të Komisionit Evropian dhe Këshillit Evropian. Qeveritarët e kanë konsideruar një ditë historike për vendin, pasi për herë të parë në Tiranë do të mbahet një samit i përmasave të tilla.
Temat kryesore të tij do të jenë te lufta në Ukrainë, migracioni, lufta kundër terrorizmit dhe krimit të organizuar si edhe përforcimi i sigurisë me qëllim parandalimin e ndërhyrjeve të huaja.
Një pjesë e liderëve ka mbërritur në kryeqytetin shqiptar të hënën, një ndër to, edhe presidentja e Kosovës, Vjosa Osmani. Ndërsa presidenti serb, Aleksandër Vuçiç, ndonëse deklaroi pak ditë më parë se nuk do të vinte në samit, pasditen e së hënës bëri konfirmoi pjesëmarrjen.
Policia publikon masat, rrugët që do të bllokohen dhe oraret
Policia e Shtetit ka shtuar masat e sigurisë duke “blinduar” kryeqytetin. Një pjesë e rrugëve do të jenë të bllokuara dhe ka devijim të rrugës edhe për disa akse interurbane të Tiranës.
Policia e Tiranës bën të ditur se bllokimi i lëvizjes në këto akse do të nisë nga ora 06:00, e mëngjesit të së martës deri në orën 18:00. Në disa rrugë u vendos perimetër sigurie, që në datën 5 dhjetor në orën 14:00.
Samiti i së martës do të zhvillohet mes protestave të drejtuara nga ish-kryeministri Sali Berisha, i cili akuzon qeverinë Rama për korrupsion dhe se nuk bën asgjë për të parandaluar emigracionin masiv.
Berisha ka thënë se protesta do të mbahet në orën 12:00 para Kryeministrisë. Edhe pse policia nuk ka dhënë leje për protestën, kreu demokrat ka deklaruar se populli opozitar do të mbushë rrugët dhe sheshet e Tiranës.
Rrugët e bllokuara
Përpos rrugëve brenda kryeqytetit, ditën e sotme kur do të mbahet Samiti BE-Ballkani Perëndimor do të ketë bllokim ose devijim të rrugës edhe për disa akse interurbane të Tiranës.
Policia e Tiranës bën të ditur se bllokimi i lëvizjes në këto akse do të nisë nga ora 06:00, e mëngjesit të së martës deri në orën 18:00.
Akset që do të bllokohen janë:
– Rruga “Rinas – Qafë Kashar” dhe anasjelltas;
– Autostrada “Tiranë- Vorë” dhe anasjelltas;
– Unaza e Madhe, nga ish-sheshi “Shqiponja”, deri te rrethi i Sanatoriumit, dhe anasjelltas;
– Rruga e Elbasanit nga rrethi i Sanatoriumit deri tek ura e Elbasanit dhe anasjelltas.
Gjithashtu, njoftohet se të gjitha rrugën që lidhin rrugën e Elbasanit, me rrugët “Papa Gjon Pali II”, “Dervish Hima”, “Asim Zeneli”, “Themistokli Gërmenji”, “Ismail Qemali”, “Mustafa Matohiti”, “Jul Variboba”, “Faik Konica”, “Fatmir Haxhiu”, “Gjeneral Nikols”, rrugën e Atjonit, “Sheh Ahmet Pazar”, si dhe të gjitha rrugët që lidhin bulevardin “Dëshmorët e Kombit” me rrugët “Ibrahim Rugova”, “Ukraina e lirë” dhe “Lek Dukagjini”, do të jenë të bllokuara.
Në këto segmente nuk do të lejohet parkimi i mjeteve. Automjetet që nuk janë larguar do të spostohen me mjete ngritëse, nga Policia Bashkiake dhe Policia e Shtetit.
Për mjetet e emergjencave mjekësore dhe ato të emergjencave civile, nuk do të ketë pengesa, përveç kontrolleve nga punonjësit e Policisë, në perimetrin e sigurisë.
Po ashtu, bëhet e ditur se të gjitha mjetet e emergjencave që do t’u duhet të lëvizin në drejtim të QSUT-së dhe spitalit “Shefqet Ndroqi”, duhet të ndjekin unazën lindore, kur vijnë nga juglindja, për të vijuar nga Shkoza-Kryegjyshata Botërore-Farka-Sanatoriumi-Kodra e Priftit-QSUT.
Gjithashtu, emergjencat mjekësore që vijnë të Spitali i Traumës, nga veriu dhe jugu, gjatë kohës së bllokimit të akseve rrugore, të ndjekin akset alternative: “Paskuqan-rruga “Azem Galica”-shinat e trenit-Spitali i Traumës” dhe “Rruga e Shkodrës-rruga “Petrit Radovicka”-rruga “Gjergj Legisi”-rruga “Lord Bajron”-Spitali i Traumës”.
Devijim të rrugës do të ketë edhe për drejtuesit e mjeteve që vijnë nga veriu, me destinacion aeroportin e Rinasit. Rrugëkalimi do të bëhet nga aksi “Fushë Prezë – Rinas”.
Për drejtuesit e mjeteve që vijnë nga Durrësi, me destinacion aeroportin e Rinasit, rrugëkalimi do të bëhet nga aksi “Vorë- rruga e vjetër e Fushë Krujës” dhe për drejtuesit e mjeteve që vijnë nga juglindja, me destinacion aeroportin e Rinasit, rrugëkalimi do të bëhet nga aksi “Elbasan – rrethrrotullimi TEG-ut- unaza lindore- Paskuqan -Kamëz- kryqëzimi i Valiasit- Rinas”.
