Kryeministri në detyrë i Kosovës, Albin Kurti, ka takuar Shefen e Misionit të Bashkimit Evropian për Vëzhgimin e Zgjedhjeve Parlamentare 2025, Nathalie Loiseau, e cila i dorëzoi atij raportin përfundimtar mbi procesin zgjedhor të 9 shkurtit.
Gjatë takimit, Kurti falënderoi Misionin e BE-së për angazhimin në monitorimin e zgjedhjeve dhe nënvizoi rëndësinë e rekomandimeve të raportit për përmirësimin e mëtejshëm të demokracisë në vend.
Ai ka ngritur disa çështje që, sipas tij, mbesin shqetësuese, përfshirë “mungesën e verifikimit” nga gazetarët hulumtues të premtimeve elektorale nga kandidatët për kryeministër, mungesën e transparencës në financimin e fushatave zgjedhore dhe vonesat në numërimin e votave.
“Gjatë diskutimit, ai ngriti disa çështje me rëndësi që lidhen me procesin zgjedhor, përfshirë:- mungesën e verifikimit nga gazetarët hulumtues profesionistë të realizueshmërisë së premtimeve të dhëna gjatë fushatës zgjedhore nga përfaqësues të partive politike, veçanërisht nga kandidatët për kryeministër, të cilat rrezikojnë të cenojnë besimin e qytetarëve dhe dëmtojnë demokracinë; -financimin e fushatave zgjedhore të partive politike, duke theksuar nevojën për transparencë të plotë të burimeve të financimit dhe kontributeve të marra gjatë fushatës; dhe -stërgjatjen e numërimit të votave”, thuhet nga ana e Kryeministrisë.
Kurti vuri theks të veçantë në gjetjet e Misionit për ndërhyrjet e jashtme në zgjedhje, duke përmendur përhapjen e dezinformatave nga mediat ruse me bazë në Serbi, si “RT Balkans” dhe “Sputnik Srbija”, të cilat, sipas raportit, shpërndanë mbi 60 artikuj që synonin manipulimin e komunitetit serb në Kosovë.
“Këto përpjekje për dezinformim përbëjnë një kërcënim serioz për integritetin e zgjedhjeve dhe stabilitetin demokratik të vendit”, thuhet në njoftimin e Zyrës së Kryeministrit.
