Presidentja e Kosovës, Vjosa Osmani, është deklaruar pas takimit me liderët e partive politike lidhur me ngërçin në Kuvendin e Kosovës.
Ajo theksoi se takimi është zhvilluar në një atmosferë konstruktive dhe pa tensione, megjithëse vullneti për zgjidhje mbetet ende në nivele minimale
“Pavarësisht dallimeve në qëndrime, diskutimi ishte i respektueshëm dhe konstruktiv. Kam përjetuar edhe takime me atmosfera të tensionuara, por ky nuk ishte i tillë. Tymi i bardhë do të dalë vetëm kur Kuvendi të konstituohet – dhe ende nuk jemi në atë pikë. Kur thashë ‘disponim minimal’, e thashë në kuptimin që vullneti ekziston, por jo në përmasa të mjaftueshme për zgjidhje të menjëhershme”, u shpreh Osmani.E pyetur nëse është diskutuar mundësia për zgjedhje të parakohshme si zgjidhje për krizën, Osmani tha se kjo mundësi është përmendur, por e ka theksuar se pa konstituimin e Kuvendit, asnjë prej opsioneve për zgjedhje nuk është i realizueshëm.
“Sipas Kushtetutës, zgjedhjet mund të ndodhin në disa raste: nëse 2/3 e deputetëve votojnë për shpërndarje të Kuvendit, nëse dështon zgjedhja e qeverisë apo nëse kalon një mocion mosbesimi. Por asnjëra prej këtyre nuk mund të ndodhë pa u konstituar më parë Kuvendi. Edhe nëse partitë bien dakord për zgjedhje, hapi i parë duhet të jetë konstituimi i tij. Nëse situata vazhdon gjatë, liderët mund të ulen e të bien dakord për zgjedhje, por edhe kjo kërkon që më parë të zgjidhet bllokada për konstituim”, tha Osmani
