Deputeti i Kuvendit të Kosovës nga radhët e Lëvizjes Vetëvendosje, Dimal Basha, ka kërkuar sqarim nga kryeprokurori i Prokurorisë Speciale të Kosovës, Blerim Isufajt, për dhënien e pëlqimit për heqjen e urdhërarrestit ndaj Radoiçiqit.
Ai, përmes një postimi në Facebook, ka thënë se pret që të marrë një përgjigje nga ana e kryeprokurorit të Speciales për sekretin që e ka lejuar Radojçiqin të lirë.
“Prokuroria në Serbi e lë Radojçiqin të qarkullojë lirshëm! Edhe në Kosovë njëjtë, Prokuroria jonë ia pati tërhequr fletarrestin derisa ai kontrollonte krimin në veri!”, ka shkruar ai.
Tutje, ai ka thënë se “nuk pres me na tregu kryeprokurori në Beograd pse e kanë liruar një terrorist, por pres që kryeprokurori Prokurorisë Speciale në Kosovë, përkatësisht Blerim Isufaj, me na tregu cili ishte sekreti me leju Radojçiçin të lirë?!“
“Kryeprokuror, çkado që na tregon nuk është më sekrete, përndryshe më shqetëson fakti që Prokuroria jonë dhe ajo në Beograd ka trajtim të njëjtë ndaj një krimineli si Radojçiç!”, ka përfunduar Basha.
