Ministrja e Industrisë, Ndërmarrësisë dhe Tregtisë, Rozeta Hajdari ka mbajtur sot një konferencë për medie, ku foli për rastin e pezullimit të certifikatave për disa biznese, në këtë rast edhe për Klan Kosovën, ndërsa një pjesë e madhe e gazetarëve dhe kameramanëve kanë vendosur ta bojkotojnë konferencën.
Me fillim të fjalës së saj, ministrja Hajdari u ndal në pezullimin e certifikatës së Klan Kosovës, ndërsa u shpreh se e di shqetësimin e gazetarëve dhe punonjësve medial, por premtoi se ky veprim nuk nënkupton cenim të fjalës së lirë.
“E kuptoj shqetësimin e punonjësve medial, sidomos për rastin e biznesit Klan Kosova, por është e rëndësishme t’u siguroj se pezullimi i certifikatës së biznesit së Klan Kosovës nuk e kishte fare për qëllim që të kufizoj fjalën e lirë, lirinë e shprehjes dhe punën e medieve në vendin tonë. Por vetëm që t’i zbatoj kërkesat legjitime sipas Kushtetutës dhe ligjeve tona”, tha ajo.
Sipas Hajdarit, kjo lidhet me një proces administrativ si në rastin e Klan Kosovës ashtu edhe të tjera që janë identifikuar, pra kanë qenë vetëm zbatim i ligjit dhe “asgjë më shumë, e as më pak”.
Ajo tha se pretendimet se MINT ka vepruar që të kufizoj lirinë e medias janë tendencioze dhe plotësisht të pavërteta.
“Ministria e Industrisë, Ndrëmarrësisë dhe Tregtisë është e përkushtuar ndaj zbatimit të ligjit dhe Kushtetutës së Republikës së Kosovës, pa kompromis, pa përjashtim dhe p[a diskriminim. Rasti i Klan Kosovës dhe rastet e tjera që deri tani fatkeqësisht i kemi identifikuar janë 48 sosh. Kanë të bëjnë ekskluzivisht me çështje administrative për regjistrimin e bizneseve pranë ARBK-së dhe për të qenë të qartë ato kanë prezantuar me përmbajtje antikushtetuese, në këtë rast qytetet e Kosovës paraqiten si pjesë e Serbisë”, ka sqaruar Hajdari.
Ajo shtoi se për këtë shkak certifikata e Klan Kosovës fillimisht u pezullua dhe biznesi në fjalë bëri ankesë, me ç’rast komisioni për shqyrtimin e ankesave pas shqyrtimit të të gjithë dokumentacionit ka konstatuar se vendimi i shkallës së parë ishte i drejtë dhe në përputhje të plotë me ligjet e Republikës së Kosovës.
Ministrja Hajdari theksoi se po ashtu pasi është siguruar dokumentacioni përkatës në Maqedoni të Veriut për pronarin e vërtetë të biznesit është parë se Kosova ende paraqitet si pjesë e Serbisë.
Ajo tha se për këto probleme është themeluar një komision që ka verifikuar edhe dosjet e shumë bizneseve tjera, në fakt janë verifikuar dosjet e 660 bizneseve dhe si rezultat komisioni ka konstatuar që në 48 raste kemi emërtime që janë kundërkushtetuese, ku në rubrikën vendi, shteti i lindjes dhe vendbanimi aktual është shkruar Prishtinë Kosovë Metohija – Serbia, Pejë – Republika e Serbisë, Gjakovë – Republika e Serbisë, si dhe Gjilan -Serbia etj.
Ajo tha se pas kësaj ARBK dje ka filluar procedurat e reja dhe fillimisht kanë shfuqizuar certifikatat për 5 biznese dhe të tjerat janë në procedurë.
E në mesin e bizneseve që janë të regjistruara me pasaporta serbe dhe vendbanimet e Kosovës i kanë paraqitur si të Serbisë, shumica janë të Devollëve.
Këto biznese që në të dhënat e tyre kanë përmbajtje antikushtetuese, në këtë rast qytetet e Kosovës i paraqesin si pjesë e Serbisë, janë:
THE BUSINESS CLUB L.L.C – Blerim Devolli
GLOBOSOS SHPK – Blerim Devolli
DEVOLLI GROUP SH.P.K – Erza Devolli
VITALAND L.L.C – Jona Devolli
FAICO SH.P.K – Blerim Devolli
ENERGY DEVELOPMENT GROUP-KOSOVA L.L.C – Vlera Devolli
KGO MEDIA INVESTMENTS HOLDING SH.P.K – KUSHTRIM GOJANI
AM INVEST GROUP SHPK – Çertifikaten e Biznesit të lëshuar nga Shkupi – Maqedonia e Veriut
