Ministrja e Industrisë, Ndërmarrësisë dhe Tregtisë, Rozeta Hajdari ka mbajtur sot një konferencë për medie, ku foli për rastin e pezullimit të certifikatave për disa biznese, në këtë rast edhe për Klan Kosovën, ndërsa një pjesë e madhe e gazetarëve dhe kameramanëve kanë vendosur ta bojkotojnë konferencën.
Me fillim të fjalës së saj, ministrja Hajdari u ndal në pezullimin e certifikatës së Klan Kosovës, ndërsa u shpreh se e di shqetësimin e gazetarëve dhe punonjësve medial, por premtoi se ky veprim nuk nënkupton cenim të fjalës së lirë.
Ajo tha se në këtë rast nuk është bërë asgjë më shumë e më pas sesa zbatim i ligjit të Republikës së Kosovës.
Ministrja Hajdari foli për bizneset që kanë bërë shkelje ligjore, e të cilat u bënë të ditura nga Ministria të hënën.
Ndryshe, Agjencia për Regjistrimin e Bizneseve në kuadër të Ministrisë së Industrisë, Ndërmarrësisë dhe Tregtisë, ka themeluar Komisionin për riverifikim të dosjeve të bizneseve të regjistruara, në veçanti të atyre me dokumente të dyshimta me emërtime antikushtetuese.
Sipas njoftimit që e ka bërë ministrja Rozeta Hajdari në Facebook, mes 660 dosjeve të rishqyrtuara, 48 sosh kanë rezultuar me emërtime kundërkushtetuese, duke e paraqitur Kosovën si pjesë të Serbisë.
“Menjëherë pas pranimit të raportit të Komisionit, ARBK ka filluar hapat administrativ të parashikuar me ligj, duke nxjerrë vendime për shfuqizimin e certifikatave të 5 bizneseve, në mes të 48 prej tyre me emërtime antikushtetuese”, ka shkruar Hajdari.
Disa dhjetëra gazetarë dhe përfaqësues të disa medieve protestuan të hënën në përkrahje të televizionit Klan Kosova në Prishtinë, pas vendimit të Ministrisë së Industrisë për t’ia pezulluar licencën e biznesit këtij televizioni javën e kaluar.
Në protestën e gazetarëve sot mori pjesë edhe një qytetar, i cili kishte shkruar edhe parullën: GJAKOVË, KOSOVË dhe PEJË, KOSOVË, kurse me një X të madh mbi: ĐJAKOVICA, SRBIJA dhe PEČ, SRBIJA.
Kjo parullë në të cilën theksohet se qytetet si Peja e Gjakova janë pjesë në Kosovës nuk është pëlqyer nga protestuesit dhe sipas qytetarit ajo është shqyer dhe nuk është lejuar të vazhdojë të jetë bashkë me protestuesit e tjerë.
E krahas protestueseve që bartën një banerë të gjerë në dorë, me mbishkrimin “Demokracia vdes në errësirë”, pati edhe qytetarë tjerë që iu bashkuan protestës.
Pas marshimit nga sheshi “Zahir Pajaziti” dhe arritjes te ai “Skënderbeu” në kryeqytet, në shkallët e Teatrit Kombëtar, disa qytetarë kanë shfaqur një banerë me mbishkrimin “Mirë se vini në Republikën e Kosovës”, kjo si përgjigje pasi biznesi për të cilin protestohej (Klan Kosova) i kishte paraqitur në fletëregjistrime qytetet e Kosovës, si të Serbisë.
