Presidentja e Kosovës, Vjosa Osmani, u ka bërë thirrje të gjitha shteteve aleate që ta dënojnë sulmin ndaj gazetarëve në Leposaviq gjatë ditës së sotme.
Policia e Kosovës ka konfirmuar se nëntë gazetarë janë sulmuar nga huliganët në Leposaviq, disa prej të cilëve kanë pësuar edhe lëndime trupore.
Osmani ka thënë se përpjekjet për ta destabilizuar Kosovën do të dështojnë.
“Gazetarët në veri të Kosovës u sulmuan sërish brutalisht nga bandat kriminale. Ata që kryejnë këto sulme duhet të përballen me drejtësinë. Përpjekjet e tyre për të destabilizuar Kosovën do të dështojnë. Këto akte të tmerrshme të dhunës së vazhdueshme duhet të dënohen nga të gjithë. Sundimi i ligjit do të mbizotërojë”, ka shkruar Osmani në Twitter.
Journalists in the north of ?? were brutally attacked again by criminal gangs. Those carrying out these attacks must face justice.
— Vjosa Osmani (@VjosaOsmaniPRKS) June 16, 2023
Their attempts to destabilize Kosovo will fail.
These appalling acts of continued violence must be condemned by all. Rule of law will prevail.
Sulmet ndaj gazetarëve i ka dënuar edhe Ambasada e SHBA-së në Kosovë.
Sulmet ndaj gazetarëve në komunat veriore të Kosovës, janë shpeshtuar javët e fundit, derisa ata po raportojnë për zhvillimet në këtë pjesë të vendit.
Tensionet në veri u rritën në fund të majit, kur Policia e Kosovës i ndihmoi kryetarët të futen në ndërtesat komunale, me gjithë kundërshtimet e serbëve lokalë.
Më 29 maj, tensionet kulmuan me përleshje ndërmjet protestuesve serbë dhe KFOR-it, ku pati dhjetëra të plagosur nga të dyja anët.
Më 16 qershor, gazetarët janë sulmuar sërish në Leposaviq, derisa po mbulonin vizitën e ministrit të Adminsitrimit të Pushtetit Lokal, Elbert Elbert Krasniqi, te kryetari i komunës së Leposaviqit, Lulzim Hetemi.
Asociacioni i Gazetarëve të Kosovës ka njoftuar se gjatë tensioneve të fundit në veri të Kosovës janë shënuar 28 sulme në dretim të ekipeve të mediave.
