Presidentja e Kosovës, Vjosa Osmani e ka filluar takimin me ministrin e Punëve të Jashtme të Polonisë, Zbigniew Rau.
Rau, i cili është edhe kryesues i OSBE-së do të takohet edhe me liderë të tjerë shtetëror gjatë ditës së sotme për të diskutuar rreth angazhimit të Polonisë në rajon si kryesuese e radhës e OSBE-së.
Pjesë e rendit të tij të ditës janë dhe takimet me udhëheqësit e Misionit të OSBE-së në Kosovë dhe me Grupin e Trajnuesve, grup ekspertësh të të drejtave të njeriut i themeluar nga OSBE.
Ai do të vizitojë po ashtu dhe Komisionin Qendror të Zgjedhjeve (KQZ), që mbështetet nga OSBE.
Kryediplomati polak me rastin e ardhjes në vendin tonë është pritur dje në Aeroportin Ndërkombëtar “Adem Jashari” në Prishtinë nga ministrja e Punëve të Jashtme dhe Diasporës, Donika Gërvalla.
Polonia është në grupin e shteteve të para që ka njohur pavarësinë e Kosovës, më 26 shkurt 2008, por ende nuk ka hapur ambasadë në Prishtinë.
Ndryshe muajin e kaluar është mbajtur ceremonia e inaugurimit të fluturimit të parë të një linje ajërore Varshavë-Prishtinë-Varshavë, e cila do të jetë në shërbim të përafrimit dhe rritjes së bashkëpunimit mes dy vendeve. Po ashtu Polonia në Kosovë ka prezencë ushtarake në kuadër të NATO-së. Tani Polonia ka në Kosovë 247 ushtarë.
