Ministri i Brendshëm i Shqipërisë, Taulant Balla, u prit nga ministri i Brendshëm i Spanjës, Fernando Grande-Marlaska, në Madrid, ku nënshkroi një memorandum për thellimin e bashkëpunimit operacional në luftën kundër trafikut të narkotikëve dhe krijimin e një grupi të ri të përbashkët hetimor të specializuar në luftën kundër trafikut të drogës.
“Kemi çuar në një nivel tjetër bashkëpunimi me Ministrinë e Brendshme të Mbretërisë së Spanjës dhe përmes saj me Policinë Kombëtare Spanjolle, për sa i përket luftës kundër krimit të organizuar, luftës kundër trafikut të lëndëve narkotike, trafikut të paligjshëm të migracionit dhe po ashtu për të krijuar grupe të përbashkëta pune mes të dy policive tona sa i përket indentifikimit të personave të përfshirë në aktivitete kriminale në të dy vendet tona qofshin këta shqiptarë që jetojnë apo janë të përfshirë në aktivitete kriminale që ndodhin në Spanjë”, u shpreh Balla.
Po ashtu, shtoi ministri, “edhe për qytetarët spanjollë, të cilët mund të kryejnë aktivitete kriminale në Shqipëri dhe po ashtu dhe në një nivel më të gjerë, duke përfituar edhe nga fakti se Spanja ka një lidhje të fortë me vendet e Amerikës Latine për të përdorur komunikimin që ka pala spanjolle me këto vende në funksion të identifikimit të qytetarëve shqiptarë të përfshirë në aktivitete kriminale në këto vende dhe që lidhen kryesisht dhe me korridoret ndërkombëtare të trafikimit të lëndëve narkotike”.
“Sikurse e ndoqët ka qenë një takim i gjatë edhe në Drejtorinë e Përgjithshme të Policisë Kombëtare duke hyrë në detaje konkrete, madje edhe në emra konkretë, në mënyrë që ne të kemi mundësinë që të intensifikojmë luftën e përbashkët kundër krimit të organizuar”, tha Balla.
“Ju e dini, në Evropë ka tashmë një koalicion evropian në luftën kundër krimit të organizuar, ku Spanja luan një rol të rëndësishëm. Edhe kjo marrëveshje i shërben pikërisht intensifikimit të punës së përbashkët sa i përket operacioneve dhe hetimeve gjithëpërfshirëse kundër grupeve kriminale që zhvillojnë aktivitetin e tyre jo vetëm në Spanjë, por në gjithë Evropën dhe në këtë kontekst mendoj që rezultatet e arritura deri më tani falë këtij bashkëpunimi, operacionet e përbashkëta edhe në kuadër të EUROPOL-it dhe të INTERPOL-it janë një sërë operacionesh që mund t’ua vëmë në dispozicion, pikërisht për rezultate që ato kanë pasur dhe do të vazhdojmë ta intensifikojmë bashkëpunimin”, theksoi Balla.
“Kemi folur dhe për migracionin e paligjshëm, është një prej sfidave më të rëndësishme me të cilat përballet Evropa dhe po ashtu edhe për çështje të tjera bashkëpunimi dy palësh”, deklaroi ministri pas takimit”, shtoi Balla.
Balla shprehu vlerësime për Prokurorinë e Posaçme për hetimet e përbashkëta.
“Falënderoj po ashtu edhe ekipet e Policisë së Shtetit, të cilat janë marrë me zbatimin dhe pjesën tjetër hetimore që lidhet me mbarëvajtjen e këtij operacioni. Është një operacion i rëndësishëm, i cili ndërlidhet edhe me atë që po ju thoja pak më parë, sepse bëhet fjalë për personazhe të krimit në Shqipëri, të cilët nuk kanë zhvilluar dhe zhvillojnë aktivitetin e tyre kriminal vetëm në Shqipëri, por bëhet fjalë për aktivitete kriminale të zhvilluara në disa vende europiane, apo përfshirë edhe Spanjën në fakt. Uroj që operacione të tilla të vijojnë të konsolidohen edhe më tej, për t’i dhënë fund kulturës së pandëshkueshmërisë së elementeve të grupeve kriminale. Kështu i kthejmë përgjigje të gjithë atyre që shpeshherë pyesin “po kokat, po kokat”. Besoj që ky është një prej atyre rasteve që flet vetë”, theksoi ministri i Brendshëm.
Letra e Qëllimit e firmosur mes dy ministrive të Brendshme synon rritjen e bashkëpunimit operacional në luftën kundër trafikut të drogës. Do të krijohet një grup i ri i përbashkët hetimor, i specializuar në luftën kundër trafikut të drogës.
Gjithashtu marrëveshja parashikon bashkëpunimin në luftën kundër tregtimit dhe trafikimit të qenieve njerëzore, në sektorin e krimit kibernetik, antiterrorizmit etj/ atsh
