Deputeti i Vetëvendosjes, Mefail Bajqinovci, nëpërmjet një shkrimi në llogarinë e tij në Facebook, ka reaguar rreth deklarave të Avdullah Hotit, i cili ka kërkuar zgjedhje dhe ka thënë se Qeveria nuk do ta përfundojë mandatin.
Bajqinovci ka thënë se Hoti po kërkon zgjedhje në kohën kur Albin Kurti po përpiqet të rrëzohet nga presidenti serb, Aleksandar Vuçiq.
“Avdullah Hoti po kërkuaka zgjedhje. Në kohën kur Vuçiqi po e dëshiron me çdo kusht rrëzimin e Albinit, opozita po përkujdeset për metodat se si t’ja mundësojnë më lehtë.
Ish-kryeministri i paligjshëm edhe më parë ka pasur deklarata absurde: thoshte se asnjë votë e LDK-së nuk kalon në Vetëvendosje; pastaj thoshte se Vetëvendosje do të zhduket si parti etj.
Edhe kjo deklaratë e tij për zgjedhje është e një kategorie të tillë”, ka shkruar ai.
Sipas tij, deputeti Hoti është mirë të përgatitet, por jo për zgjedhje. Ai së bashku me të tjerët duhet të përgatiten që Serbisë t’i qëndrojmë përballë sepse jemi në të drejtën tonë.
“Çfarëdo qëndrimi jashtë këtij kuadri, është në dobi e në shërbim të Vuçiqit. Deputeti Hoti, partia e tij dhe të tjerët nga opozita duhet t’i shmangen atij rreshti. Në të kundërt, populli i bën që ta harrojnë 12%-shin!”, përfundon Bajqinovci.
